एनआई सी एशिया लघुवित्तको छैठौँ वार्षिक साधारणसभा सम्पन्न, ढकाल सञ्चालकमा निर्वाचित

एनआईसी एशिया लघुवित्त वित्तीय संस्था लिमिटेडको छैठौँ वार्षिक साधारणसभा सुनसरीको धरानमा शुक्रवार सम्पन्न भएको छ । उक्त सभाले विभिन्न एजेन्डासहित संस्थाको आव २०७९–८० को सञ्चालक समितिको प्रतिवेदन, वार्षिक आर्थिक विवरण पारित गरेको एनआईसी एशियाका प्रमुख सूचना अधिकारी राजेन्द्र न्यौपानेले जानकारी दिए ।  

सभाले संस्थाका शेयरधनीहरूलाई चुक्ता पूँजीको १५ प्रतिशतका दरले २६ करोड ९ लाख १६ हजार रुपैयाँ लाभांश (कर प्रयोजन समेत) वितरण गर्ने प्रस्ताव पारित गरेको छ ।

 यसका साथै, उक्त सभामा प्रचलित कानून तथा विद्यमान व्यवस्थाअनुसार सञ्चालन गरिएको निर्वाचन कार्यक्रमबाट संस्थापक एनआई सी एशिया बैंक लिमिटेडका तर्पmबाट मनोनित भई प्रतिनिधित्व गरेका दीपक ढकाल सञ्चालक पदमा निर्विरोध निर्वाचित भएका छन् ।

साथै, नव निर्वाचित सञ्चालक ढकालले संस्थाका अध्यक्ष सन्तोषकुमार राठीसमक्ष शपथ ग्रहण गरी आफ्नो पद बहाल गरेका छन् । बैंकिङ क्षेत्रमा लामो समयदेखि कार्यानुभव रहेका ढकाल एनआईसी एशिया बैंकमा प्रमुख जोखिम अधिकृतमा कार्यरत थिए । उनको कार्यानुभवबाट संस्थाले लिएको लक्ष्य हासिल गरी संस्थालाई लघुवित्त वित्तीय संस्थाहरूमाझ अग्रणी, सबल तथा सशक्त लघुवित्त संस्थाको रुपमा स्थापित गराउन अझै थप सहयोग पुग्ने संस्थाको विश्वास रहेको कम्पनीले जनाएको छ ।