कोशी प्रदेश स्वास्थ्य आपूर्ति व्यवस्थापन केन्द्रले खरिद गर्न लागेको सिटिस्क्यान मेसिनको टेन्डर प्रक्रिया विवादमा परेको छ । केन्द्रले मोरङको उर्लावारीस्थित मदन भण्डारी अस्पताल तथा ट्रमा सेन्टरको लागि सिटिस्क्यान मेसिन खरिद गर्न आह्वान गरेको टेन्डर प्रक्रिया विवादमा परेको हो ।  टेन्डर प्रक्रियामा मिलेमतोको आरोप लागेको छ । 

गत कार्तिक २४ गते १२८ स्लाइसको सिटिस्क्यान मेसिन खरिदका लागि टेन्डर आह्वान गरिएको थियो । टेन्डर आह्वान गर्दा इप्रस्ताव पेश गर्ने मिति पुस ९ गतेसम्म राखिएका थियो ।  तर, अध्ययनमा समय लागेको भन्दै त्यसलाई बढाएर पुस १७ गते पुर्याइयो । 

मन्त्रालयका कर्मचारीले भनेको कम्पनीले प्रस्ताव पेश नगरेपछि समय थप गरिएको स्रोतको दाबी छ । पुस ९ गतेसम्म हिमालय मेडिकल टेक्नोलोजी प्रालिको एक मात्र प्रस्ताव परेको थियो । 

केन्द्रले  टेण्डर खोल्ने स्थानसमेत फरक गरेपछि विवाद बढेको छ ।  केन्द्रले टेन्डर खोल्ने स्थान आपूर्ति व्यवस्थापन केन्द्र विराटनगर हुनुपर्नेमा नरदेवि अस्पताल मैतिदेवी भनेपछि विवाद थप बढेको हो । 

मंसिर २४ गते आपूर्ति केन्द्रले राखेको प्रि–बिड बैठकमा सप्लायर्सहरूले स्थानबारे प्रश्न गरेपछि केन्द्रले स्थान सच्याएको थियो । केन्द्रका प्रमुख मण्डल भने त्यो मानवीय त्रुटि मात्र भएको बताए । 

केन्द्र खरिद गर्न लागेको सिटिस्क्यानको मापदण्ड चिनियाँ उत्पादन निओसफ्ट कम्पनीसँग मिल्दोजुल्दो राखिएको आरोपसमेत लागेको छ । कम्पनीको नेपाली सप्लायर्स हिमालय मेडिकल टेक्नोलोजी प्रालि हो । 

पुस ९ गतेको लागि टेण्डर भर्ने अन्तिम मिति तोकिएकोमा १७ गतेसम्म पुर्‍याउनु र प्रि–बिड बैठकमा सप्लायर्सहरूले मापदण्ड सम्बन्धमा राखेको चासो पनि हिमालय मेडिकल टेक्नोलोजीको मात्र सम्बोधन गर्नुमा मिलेमतो देखिएको जानकारहरू बताउँछन् । 

हिमालयको अनुकुल मापदण्ड राखिएको भन्दै अन्य सप्लायर्सले सच्याउन आग्रह गर्दा आपूर्ति केन्द्रले वास्ता नगरेको उनीहरूको आरोप छ । ‘कोशी प्रदेश स्वास्थ्य आपूर्ति व्यवस्थापन केन्द्रले खरिद गर्न लागेको सिटी स्क्यान मेसिन निजी अस्पतालले किन्दा चानचुन ५ करोडभन्दा केही बढी पर्ला’ एक सप्लायर्सले भने, ‘६ करोडमा टेन्डर स्वीकृत गरिदिए सप्लायर्सलाई पनि राम्रै नाफा हुन्छ ।’ करिब सात करोडमा मेशिन किन्न लागिएको छ । 

आपूर्ति व्यवस्थापन केन्द्रले खरिद प्रक्रिया सुरु गर्नुअगाडि केन्द्रका बायोमेडिकल इञ्जिनियर कुशल दाहाल र कोशी अस्पतालले पठाएका विज्ञ रेडियोलोजिष्ट डा. राजा सुवालले सिटी स्क्यानको स्पेसिफिकेशन तयार गरेका थिए । केन्द्रका अनुसार त्यसमा ट्रमा सेन्टरले पठाएका केही बुँदा पनि थपिएको थियो । 

तयार भएको मापदण्ड मन्त्रालयमा सूचीकृत भएका सप्लायर्सलाई पठाएर कोटेशन माग गरेको केन्द्रले कोटेशनअनुसार २१ प्रतिशत घटाएर लागत अनुमान तयार गरेको जनाएको छ । 

केन्द्रका अनुसार कोटेशन पेश गर्ने ८ सप्लायर्समध्ये ५ वटा प्रभावग्राही देखिएका थिए । उनीहरूले न्युनतम् ७ करोड ३० लाखदेखि ११ करोडसम्मको कोटेशन पेश गरेको बताइएको छ ।

केन्द्रका निर्देशक डा. वीरेन्द्र कुमार मण्डलले टेण्डर प्रक्रिया विधसम्मत् रूपमा अगाडि बढेको भए पनि अहिले अनावश्यक विवाद खडा गरिएको दाबी गरे । केन्द्रसँग अन्तर्राष्ट्रिय टेन्डरको अनुभव नभएको अवस्थामा मन्त्रालय, विभाग र विज्ञहरूसँगको परामर्शमा टेन्डर आह्वान गरिएको उनले बताए । उनले कुनै मिलोमतो नभएको बताए । ‘सप्लायर्सहरूले दिएको कोटेशनलाई आधार बनाएर त्यसको औसत मूल्यमा पनि २१ प्रतिशत कमगरी लागत अनुमान तयार गरिएको हो,’ उनले भने, ‘त्यसैले मिलेमतो हुने कुनै सम्भावना छैन ।’ 

सुरुवातमा ५ वटा सप्लायर्सले कोटेशन पेश गरेको भए पनि टेन्डर प्रक्रियामा एउटा मात्र समावेश भएको आधारमा मिलेमतोको आरोप लगाउन नमिल्ने उनको भनाइ छ । अरु सप्लायर्सहरू किन प्रतिस्पर्धामा आएनन् भन्ने आफूहरूले भन्न नसक्ने उनले बताए । 

विज्ञसहित ७ जनाको मूल्यांकन समितिले टेण्डर हालेको सप्लायर्सको प्राविधिक र आर्थिक प्रस्ताव अध्ययन गरेपछि मात्र उसले टेन्डर पाउने कि नपाउने यकिन हुने उनले बताए । 

मूल्यांकन समिति निर्देशक डा. मण्डलको संयोजकत्वमा रहेको छ । समितिमा आपूर्ति केन्द्रका लेखा प्रमुख  तारा घिमिरे, खरिद इकाइ शाखाका प्रमुख शम्भू साह, प्रशासन प्रमुख काशी पराजुली, बायोमेडिकल इन्जिनियर कुशल दाहाल छन् । यस्तै, कोशी अस्पतालबाट बायोमेडिकल इन्जिनियर गोविन्द मिश्र र  रेडियोलोजिष्ट डा. राजा सुवाल विज्ञको रुपमा समितिमा छन् ।

इञ्जिनियर र डाक्टरसहित तीन प्राविधिकले प्राविधिक प्रस्ताव हेरेपछि मूल्यांकन समितिले आर्थिक प्रस्ताव हेरेर निर्णय गर्नेछ । हिमालय मेडिकल टेक्नोलोजीले पेश गरेको प्रस्ताव अहिले नै स्वीकृत भइनसकेको केन्द्रका प्रशासन प्रमुख काशी पराजुलीले बताए ।