‘लोकान्तर राउण्ड अप’ पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
राष्ट्रपति रामचन्द्र पौडेलले संघीय संसद्को अधिवेशन आह्वान गरेका छन् । सरकारको सिफारिशमा राष्ट्रपति पौडेलले बुधवार यही माघ २२ गतेदेखि संघीय संसद्को हिउँदे अधिवेशन आह्वान गरेका राष्ट्रपति कार्यालयकी प्रवक्ता शैलजा रेग्मी भट्टराईले जानकारी दिइन् ।
सरकारले संसद्को अधिवेशन बोलाउन मंगलवार सिफारिश गरेको थियो ।
००००
काठमाडौँ महानगरपालिकाका मेयर बालेन शाहको पछिल्लो निर्णय विवादमा तानिएको छ । बालेनको निर्णयको विरोधमा एकसाथ दुई स्थानमा आन्दोलन भएका छन् ।

 बुधबार मेयर बालेनको निर्णयविरुद्ध काठमाडौँको प्रमुख व्यापारिक केन्द्र मानिने न्युरोड र काठमाडौँ महानगरपालिकाको कार्यालय रहेको कमलादीमा आन्दोलन भएका हुन् ।  
दुवैतिर आन्दोलन गर्नेहरु भने व्यापारी नै हुन् । न्युरोडका व्यापारीले सो क्षेत्रमा पार्किङ हटाएको विरोधमा र कमलादीमा फुटपाथमा व्यापार गर्न नदिएको विरोधमा मेयर बालेनविरुद्ध आन्दोलन गरेका हुन् ।

काठमाडौँ महानगरपालिकाले सरोकारवालाहरूसँग परामर्श नगरी पार्किङ निषेध गरेको विरोधमा व्यापारीहरूले बुधबार पनि विरोध प्रदर्शन गरेका छन् । धर्मपथ, जुद्ध सालिकदेखि इन्द्रचोक तर्फको सडक खण्ड खिचापोखरी, प्युखा, महाबौद्ध, पाको लगायतका क्षेत्रमा सञ्चालित पार्किङहरुमा निषेध गरेको विरोधमा उनीहरुले प्रदर्शन गरेका हुन् ।   माग पुरा नभएसम्म आन्दोलन जारी रहने दुबै पक्षको भनाइ छ । 
००००
राष्ट्रिय सभा सदस्य निर्वाचन बिहीबार हुँदैछ । निर्वाचनका लागि आवश्यक सुरक्षा व्यवस्थासहित तयारी कार्य पूरा भएको आयोगले जनाएको छ । प्रदेश सभा सदस्य, गाउँपालिका अध्यक्ष र उपाध्यक्ष तथा नगरपालिका प्रमुख र उपप्रमुखले मतदान गर्ने यस निर्वाचनमा  बिहान ९ बजेदेखि अपरान्ह ३ बजेसम्म सम्बन्धित प्रदेशको तोकिएका मतदान स्थल तथा मतदान केन्द्रमा मतदान हुनेछ ।

निर्वाचनमा प्रदेश सभाका सदस्यका लागि सेतो रङको कागजमा हरियो रङको मसीको विवरण तथा निर्वाचन चिन्ह रहेको मतपत्र र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुखका लागि सेतो रङको कागजमा रातो रङको मसीको विवरण तथा निर्वाचन चिह्न रहेको मतपत्रको व्यवस्था गरिएको छ ।
००००
धनगढीमा पाँच तले घरको छतबाट हाम फालेका व्यवसायीको मृत्यु भएको छ ।
धनगढी उपमहानगरपालिका–४ बसपार्कमा रहेको सन्दीप स्टोरका सञ्चालक ५३ वर्षीय सन्तोष अग्रवालको उपचारका क्रममा मृत्यु भएको कैलाली प्रहरीले जनाएको छ ।

छतबाट हाम फालेको अवस्थामा भेटिएका अग्रवाललाई तत्कालै नवजीवन अस्पतालमा लगिएको त्यही उनको मृत्युको घोषणा भएको कैलालीका प्रहरी नायब उपरीक्षक कुलदेव चन्दले लोकान्तरलाई जानकारी दिए ।
००००
आज पौष शुक्ल पूर्णिमा । आजदेखि माघ शुक्ल पूर्णिमासम्मको एक महिने अवधिमा नेपालका विभिन्न शक्तिपीठको पूजा आराधना गरिन्छ । ती स्थानमा सतीदेवीको अङ्ग पतन भएपछि देवीदेवताको बास रहेको विश्वासका आधारमा यो परम्परा सुरु भएको हो । आजदेखि वैदिक सनातन धर्मावलम्बीले घर घरमा विधिपूर्वक गरिने माघ स्नान, स्वस्थानी व्रत एवं कथा वाचन सुरु गरेर यी देवीदेवताको पूजा आराधना सुरु गर्दै छन् ।
००००
प्रधानमन्त्री पुष्पकमल दाहाल ‘प्रचण्ड’ले आफ्नो कार्यसम्पादनलाई सिंहदरबार केन्द्रित गरेका छन् । गत पुस १० गते सरकार गठन भएको एक वर्ष पुगेको अवसरमा राष्ट्रका नाममा सम्बोधन गर्दै उनले सरकारको कार्यशैली परिवर्तन गरेर काम गर्ने प्रतिबद्धता व्यक्त गरेअनुसार नै आफ्ना कामकारबाहीलाई परिणाममुखी र सिंहदरबार केन्द्रित गर्दै आएका हुन्। 
प्रधानमन्त्री प्रचण्डका निजी सचिव अर्जुन भण्डारीले शनिबार र बिदाको दिनबाहेक प्रधानमन्त्रीले सधैँजसो सिंहदरबारबाटै काम गर्दै आएको जानकारी दिए ।
००००
दक्षिण अफ्रिकामा जारी आईसीसी यू–१९ क्रिकेट विश्वकप प्रतियोगितामा नेपाल दोस्रो खेलमा पनि पराजित भएको छ ।
बुधवार राति सकिएको आफ्नो दोस्रो खेलमा नेपाल पाकिस्तानसँग ५ विकेटले पराजित भएको हो ।
००००
नेपाल वायु सेवा निगमले अन्तर्राष्ट्रिय उडान भर्ने न्यारोवडी र वाइडवडी विमान किन्नका लागि कर्मचारी संचय कोष र नागरिक लगानी कोषबाट लिएको ऋण स्वाप (एउटा वित्तीय संस्थाबाट लिएको ऋण अर्को बैंकमा निश्चित शर्तहरु पालना गरेर सार्ने) गर्ने भएको छ । यसका लागि निगमले मंगलवार अन्तर्राष्ट्रिय आशयपत्र (ईओआई) आह्वान गरेको छ ।  
००००
जाजरकोट भूकम्पबाट प्रभावितको सहयोगका लागि प्रधानमन्त्री दैवीप्रकोप सहायताका कोषमा हालसम्म रू २८ करोड ७१ लाख ४१ हजार छ सय ६५ बराबर सङ्कलन भएको छ ।
प्रधानमन्त्री तथा मन्त्रिपरिषद्को कार्यालयले उपलब्ध गराएको विवरणअनुसार सोमवारसम्ममा विभिन्न सङ्घसंस्था तथा व्यक्तिका तर्फबाट सो बराबरको सहयोग रकम जुटेको हो ।
००००
सरकारले गैरआवासीय नेपाली संघ अन्तर्राष्ट्रिय समन्वय परिषद् (एनआरएनए)को चुनाव विवाद छानबिन गर्न समिति गठन गरेको छ ।

मंगलवार बसेको मन्त्रिपरिषद्को बैठकले छानबिन समिति गठन गर्ने निर्णय गरेको हो । एनआरएनएको चुनाव विवादको छानबिन गरी १५ दिनभित्र प्रतिवेदन पेश गर्न महान्यायाधिवक्ताको कार्यालयका सहमहान्यायाधिवक्ता ध्रुवकुमार चौहानको संयोजकत्वमा समिति गठन गरिएको हो ।
००००
प्रधानमन्त्री पुष्पकमल दाहाल ‘प्रचण्ड’ले सरकारको एक वर्ष पुगेको अवसरमा मात्र हैन, पटक–पटक मन्त्री हेरफेरको कुरा गरिसकेका छन् । १० पुसमा तेस्रो कार्यकालको एक वर्ष पूरा गरेपछि प्रचण्डले कार्यक्षमता प्रमाणित गर्न नसक्ने मन्त्रीलाई हटाउने प्रस्ट संकेत गरेका थिए ।
००००
सुरक्षण मुद्रण केन्द्रका तत्कालीन कार्यकारी निर्देशक विकल पौडेल र नेपाल टेलिकमका तत्कालीन कार्यकारी निर्देशक सुनिल पौडेल पक्राउ परेका छन् ।
अख्तियार दुरुपयोग अनुसन्धान आयोगले पौडेलद्वयलाई बानेश्वर र बबरमहलबाट नियन्त्रणमा लिएर हिरासतमा राखेको आयोग उच्च स्रोतले लोकान्तरलाई जानकारी दियो ।
००००
भौतिक पूर्वाधार तथा यातायातमन्त्री प्रकाश ज्वालाले सवारी चालक अनुमतिपत्र (लाइसेन्स) छाप्ने अधिकार प्रदेश सरकारलाई दिने तयारी भइरहेको बताएका छन् ।
पार्टीको केन्द्रीय स्कूल विभागद्वारा आयोजित प्रशिक्षण कार्यक्रममा मन्त्री ज्वालाले जनतालाई सहजरुपमा सेवा उपलब्ध गराउन अनुमतिपत्र छाप्ने अधिकार प्रदेशलाई दिन लागिएको बताए ।