माघ २६ गतेबाट रिलिजमा आउन लागेको फिल्म ‘हात्तीछाप’लाई लिएर अभिनेता दयाहाङ राई उत्साहित देखिएका छन् । 

सञ्चारकर्मीसँगको कुराकानीमा उनले फिल्मको कथावस्तु आफूलाई निकै मन परेकाले काम गरेको बताए । 

उनले यसका निर्देशक सिमोस सुनुवारसँग काम गर्न पाउँदा खुशी लागेको समेत बताए ।

यो फिल्मबाट आफू सन्तुष्ट रहेको दयाहाङ बताउँछन् । 

उनले भने – ‘यसको मुख्य उद्देश्य त व्यावसायिकता नै हो । तर, पनि फिल्मले समाजका विभिन्न विषयवस्तुलाई समेटेको छ । यो फिल्म दाम्मी बनेको छ । यसैले, म उत्साहित छु ।’ 

दयाहाङसँगै रहेकी नायिका उपासना सिंह ठकुरीले पनि यसको कथावस्तु शक्तिशाली रहेको बताइन् । फिल्म भित्रका दयाहाङ कस्ता प्रेमी हुन् भन्ने सञ्चारकर्मीको प्रश्नमा उपासनाले भनिन् –‘फिल्म भित्र दयाहाङ अम्बरेको पात्रमा हुनुहुन्छ । जसले, आफ्नी प्रेमिकालाई मात्र नभएर सिंगो समाज र देशको बारेमा सोच्छ । जसको मनमा कुनै पनि स्वार्थ छैन ।’ 

फिल्मको ट्रेलरमा भूकम्पको दृश्य पनि समावेश गरिएको छ । यो फिल्मले भूकम्पको कथा नै भन्न खोजेको हो या अरू के हो भन्ने प्रश्नमा दयाहाङले भने – ‘त्यो एउटा पार्ट मात्र हो । यसको स्टोरीको संसार छुट्टै छ । भूकम्पले फिल्मको कथा संसारमा एउटा नयाँ समस्या थप्छ ।’ 

उपासनाले फिल्मले नेपाली दर्शकलाई भावनामा जोड्ने बताइन् । ‘यसलाई व्यावसायिक फिल्मको रुपमा मात्र हेर्नु हुँदैन । सबै नेपालीहरूले भोगेको विषयलाई लिएर कथा बनाइएको छ’ – उनले भनिन् । 

फिल्मले पैसाको कथालाई पनि उठान गरेको दयाहाङले बताए । 

किरण नेपालीको प्रस्तुतिमा सिमोस सुनुवारको निर्देशन रहेको फिल्ममा सौगात मल्ल, बेनिशा हमाल, विजय बराल, विल्सन विक्रम राई, बुद्धि तामाङ लगायतका कलाकारको पनि अभिनय छ ।