सोलुखुम्बुमा एक वर्षको अवधिमा १ सय ६५ जनाले जिल्लामै आँखाको मोतियाविन्दुको शल्यक्रिया गराएका छन् । सन् २०२३ मा जिल्लाको विभिन्न स्थानमा उनीहरूले मोतियाविन्दुको शल्यक्रिया गराएका हुन् । 

जिल्ला सामुदायिक आँखा केन्द्र फाप्लुका प्रमुख विधान ताम्राकारका अनुसार ८५ पुरुष र ८० महिलाको मोतियाविन्दुको शल्यक्रिया गरिएको हो । उनीहरूको फाप्लुमै शिविर सञ्चालन गरी शल्यक्रिया गरिएको हो । 

‘गाउँघरमा अझै पनि आँखामा मोतियाविन्दु पालेर बस्न बाध्य छन्, उनीहरूलाई लक्षित गर्दै वर्षभरि विभिन्न ठाउँमा छनोट शिविर सञ्चालन गरेका हौं, त्यो शिविरबाट छानिएकाको शल्यक्रिया गर्न तिलगङ्गा आँखा प्रतिष्ठानसँगको समन्वयमा शल्यक्रिया शिविर सञ्चालन गरेका थियौं’, उनले भने ।

केन्द्रले जिल्लाका ३३ स्थानमा आँखा शिविर सञ्चालन गरेको थियो । आँखा केन्द्रले फाप्लुमा दुई पटक  तिलगङ्गा आँखा प्रतिष्ठान काठमाडौंका विशेषज्ञसहितको उपस्थितिमा मोतियाविन्दु शल्यक्रिया शिविर सञ्चालन गरेको प्रमुख ताम्राकारले जानकारी दिए ।

सोलुखुम्बुमै आँखाको मोतियाविन्दुको शल्यक्रिया भएपछि बिरामी खुसी भएका छन् । शल्यक्रिया गर्न काठमाडौं जानुपर्दा हजारौं रुपैयाँ खर्च हुने तथा झन्झटसमेत हुने भएकाले गाउँमै उपचार भएपछि राहत मिलेको सल्लेरीकी वृद्धा दाटी शेर्पाले बताइन् ।

उनले भनिन्, ‘आँखाले राम्रोसँग नदेखेको धेरै भएको थियो, उपचार गर्न पनि काठमाडौं कहिले पुग्नु, यतिकै बसेकी थिएँ । बुढेसकालमा अब त आँखा देख्दिँन होला भनेको त, फेरि देख्ने भएँ ।’

दुर्गम क्षेत्रका नागरिक धेरैजसो आँखामा मोतियाविन्दु पालेर बस्ने गरेको आँखा स्वास्थ्य कार्यकर्ता दिनेश राईले बताए । उनले भने, ‘चेतनाको कमी तथा जिल्लामा आँखाको शल्यक्रिया नहुने भएकाले पनि उनीहरू रोग पालेरै बस्ने गर्छन् । शिविर सञ्चालन भएपछि उनीहरूलाई राहत मिलेको छ ।’

पाँच हजारले लिए नेत्र सेवा

जिल्ला सामुदायिक आँखा केन्द्र फाप्लुले सन् २०२३ मा पाँच हजार दुई सय २१ जनालाई नेत्र सेवा प्रदान गरेको छ । सेवा पाउनेमा दुई हजार आठ सय छ महिला र दुई हजार चार सय १५ पुरुष रहेका आँखा केन्द्रको तथ्याङ्कमा उल्लेख छ । 

सेवा लिनेमा चार हजार दुई सय ६१ जना नयाँ र पाँच सय ७९ जना पुराना बिरामी रहेको आँखा स्वास्थ्य कार्यकर्ता दिनेश राईले जानकारी दिए ।

उक्त समयमा दुई हजार तीन जनाले चस्मा समेत बनाएका छन् । चार हजार सात सय १४ जनालाई औषधि वितरण गरिएको उनले बताए ।