अर्थमन्त्री डा. प्रकाशशरण महतले अर्थतन्त्रका सूचकहरूमा लक्ष्यअनुसार प्रगति नभएको स्वीकारेका छन् । 

चालू आर्थिक वर्ष २०८०/८१ को बजेटको अर्धवार्षिक समीक्षा कार्यक्रममा अर्थमन्त्री महतले बजेट व्यवस्थापनमा चुनौती रहेको र त्यहीकारण आर्थिक सूचकहरूमा सोचेअनुसार प्रगति नभएको बताएका हुन् । 'धेरै सकारात्मक काम भएको छ तर लक्ष्यअनुसार सूचकहरूमा प्रगति आएन', उनले भने ।

उनले पर्यटन क्षेत्रमा सुधार भएको, मूल्यवृद्धि नियन्त्रणमा रहेको र आगामी दिनमा कर्जा प्रवाह अझै बढाउने गरेर नीतिगत काम गरेको दाबीसमेत गरे ।

'बजारमा कन्फिडेन्स बढाउनु छ', बजेटको समीक्षाका क्रममा उनले भने, 'विप्रेषण बढी चलायमान हुँदा आर्थिक गतिविधि बढ्छ, वस्तु आयात घटेको छ, निर्यात घटेको छ । निर्यात कम हुनुमा उत्पादनशील क्षेत्रले गति नलिँदा कम भएको हो । आयातमा गैरभन्सार चुहावटको आशंका गरिएको छ सरकारको खर्चमा सबैको चिन्ता छ । समग्र खर्च ३२.५७ प्रतिशत छ ।'

उनले राजश्वमा ९ दशमलव ६७ प्रतिशतले वृद्धि भएको दाबीसमेत गरे । 'राजस्व संकलन ७७ दशमलव ४ प्रतिशत मात्र छ । वृद्धिदर भने ९ दशमलव ६७ प्रतिशत छ,' उनले भने ।