टी–ट्वान्टी शृङ्खलाको अन्तिम खेलमा नेपाल ६ विकेटले विजयी भएको छ ।​

कीर्तिपुरस्थित त्रिवि क्रिकेट मैदानमा शनिवार वेस्ट इन्डिज ‘ए’ले दिएको १ सय ७३ रनको लक्ष्य नेपालले १८.५ ओभरमा ४ विकेटको क्षतिमा पूरा गर्‍यो ।

खेलको अठारौं ओभरमा कुशल मल्लले ५ बलमै २२ रन हानेपछि नेपाललाई विजयी बन्न सहज भएको हो । सो ओभरमा मल्लले ४ चौका र १ छक्का प्रहार गरे । उनले १८ बलमा ३ चौका र ३ छक्काको मद्दतमा अविजित ३७ रन बनाए । 

त्यस्तै आसिफ शेखले ५१ रनको योगदान दिए । उनले ३५ बलमा दुई चौका र चार छक्का हाने । अनिल शाहले ४५ बलमा चार चौका र चार छक्कासहित ५८ रन बनाए । कुशल भुर्तेलले १३ र दीपेन्द्रसिंह ऐरीले ५ रन बनाए । 

यसअघि वेस्ट इन्डिज ‘ए’का लागि एलिक एथानाजेले सर्वाधिक ४२ रनको योगदान दिए । उनले २९ बल खेल्ने क्रममा एक चौका र तीन छक्का प्रहार गरे ।

यस्तै रोस्टन चेसले ३३ रन बनाए । उनले २१ बल खेल्ने क्रममा पाँच चौका हाने । जोनसन चाल्र्सले २४, म्याथ्यु फर्डले २३, कदीम एलियनले ११ र मार्क दयालले ११ रन बनाए ।

बलिङतर्फ नेपालका सोमपाल कामी र सागर ढकालले ३/३ तथा अविनाश बोहराले १ विकेट लिएका थिए ।

टी–ट्वान्टी शृङ्खलाको पहिलो खेलमा नेपालले  वेस्ट इन्डिज ‘ए’लाई चार विकेटले हराएको थियो ।

त्यसपछिको दोस्रो खेलमा नेपाल १० रन, तेस्रो खेलमा ७६ रन र चौथो खेलमा २८ रनले पराजित भएको थियो ।