काठमाडौं, २९ जेठ - विश्वको ध्यान आकर्षित गर्दै भएको किम जोङ उन र डोनाल्ड ट्रम्प भेटघाटमा एउटा संयुक्त समझदारीमा हस्ताक्षर भएलगत्तै अन्तराष्ट्रिय मिडियाहरू दुवै नेताको ‘बडी ल्याङ्ग्वेज’को अर्थ खोज्न हतारिएका छन् ।

किम र ट्रम्प हात मिलाइरहेको एउटा फोटोमा किमको हात केही माथि उठेको छ । ‘के किमले संसारलाई आफू अमेरिकासँग झुक्ने गरी सम्झौता गर्न नचाहेको संकेत दिएका हुन् ?’ या यो किमको हात मिलाउने सामान्य तरिका मात्र हो ?  

दुवै नेताहरू एकले अर्काको अनुहारमा हेर्दा मात्र मुस्कुराउने गरेको र अन्य समयमा गम्भीर देखिने गरका भिडियो र फोटाहरू सामाजिक संजाल र राष्ट्रिय अन्तर्राष्ट्रिय मिडियामा भाइरल भइरहेका छन् । यसले उनीहरू एकआपसमा सम्झौता गर्न संवेदनशील छन् र सम्झौतामा भएका बुँदाहरू साँच्चिकै गम्भीर छन् भन्ने अर्थ लाग्न सक्छ ।

भेटघाटपछि ट्रम्पले आफूहरूबीचको वार्ता अत्यन्त सफल भएको बताए भने किमले अब एक नयाँ युगको शुरूआत भएको टिप्पणी गरे ।

किम-ट्रम्प भेटघाटले विश्वलाई केही महत्त्वपूर्ण सन्देश दिएको छ । पहिलो सन्देश हो, जस्तोसुकै असमझदारी पनि वार्ताबाट हल गर्न सकिन्छ । यो भेटमा अमेरिकाको अभीष्ट पनि स्पष्ट देख्न सकिन्छ । ट्रम्पले अमेरिका नै शान्तिका लागि पहल गर्ने देश हो भन्ने सन्देश विश्वलाई दिन चाहन्छन् ।

पछिल्लो समय आतंकवादलाई प्रश्रय दिइरहेको भन्दै अमेरिकाको आलोचना हुने गरेको छ । युद्धभूमि सिरियामा अमेरिकाको भूमिका पनि आलोचित हुने गरेको छ । डोनाल्ड ट्रम्पको आप्रवासी खेद्ने नीतिको विश्वव्यापी आलोचना भएको थियो ।

तर किमसँगको भेटघाटपछि ट्रम्पलाई विश्वशान्तिको नेतृत्व गरेको श्रेय जान सक्छ र आलोचनाका स्वरहरू मत्थर हुन सक्छन् भन्ने विषयमा ट्रम्प जानकार छन् ।  

किम र ट्रम्पले हस्ताक्षर गरेको संयुक्त समझदारीमा के छ भन्ने हालसम्म नखुलाइए पनि त्यसमा उत्तर कोरियाले विकसित गरेको परमाणु हतियारको सहज व्यवस्थापन गर्नुपर्ने र उत्तर कोरियामाथि लगाइएको विभिन्न तहका आर्थिक प्रतिबन्धहरूलाई खारेज गर्नुपर्ने बुँदाहरू हुन सक्ने अन्तर्राष्ट्रिय विश्लेषकहरूको दाबी छ ।

दुवै नेताहरूको हाउभाउ हेर्दा भेटघाट असफल होला भन्नु उपयुक्त नभए पनि वार्तालाई प्रभाव पार्ने गरी दक्षिण कोरिया, जापान र चीन लगायतका देशहरूको स्वार्थ पनि समेटिएको कारण वार्ताले सोचेअनुरुप सफलता प्राप्त गर्न नसक्ने सम्भावना भने जीवितै छ ।