काठमाडौं - राजधानीमा सार्वजनिक यातायात निकै असुरक्षित मानिन्छ । कतिपय स्थानमा सडक निकै साँघुरो छ, फराकिलो सडक भएको ठाउँमा पनि लेन अनुशासन पालना हुँदैन ।

पैदल हिँड्ने तथा साइकल र मोटरसाइकल चढ्नेहरू सार्वजनिक बस, टिप्पर, निजी सवारी साधन र स्कूल क्याम्पसका बसहरूबाट असुरक्षित महसूस गर्ने गर्दछन् । मोटरसाइकलहरू समेत जथाभावी हाँक्दा निम्तिने दुर्घटना त छँदैछ ।

बसमा यात्रु भर्ने नाममा एकै रूटमा चल्ने सवारीसाधनबीच हुने तीव्र प्रतिस्पर्धाले काठमाडौंको समग्र यातायात व्यवस्थापनमा चुनौती थपिएको छ ।

सार्वजनिक सवारी साधनमा यात्रु ओसार्न प्रतिस्पर्धा हुनु ठीकै हो, तर नियम मिचेरै सडकमा दादागिरी देखाइरहेका नेपाल यातायातका दुई बसलाई प्रहरीले सोमवार नियन्त्रणमा लिएको छ । 

धेरै यात्रु राखेर धेरै पैसा कमाउन सडकमा अन्य सवारी साधनको वास्ता नगरी हुँइकिएर मोटरसाइकललाई चेपुवामा पार्ने दुई बसलाई सोमवार जाउलाखेलमा ट्राफिक प्रहरीले नियन्त्रणमा लियो । दुवै बसहरू नेपाल यातायातका थिए ।

ती दुवै बस छिटो दौडिने होडबाजी चलिरहेका बेला एउटा मोटरसाइकल बीचमा आइपुग्यो ।

पछाडिको बसको ड्राइभरले मोटरसाइकलको पर्वाह गरेनन्, अघिल्लो बसलाई जसरी पनि उछिन्छु भन्दै झन् एक्सिलरेटर थिचे । घटना सोमवारको हो ।

पछाडिबाट बसले ठक्कर दिएपछि बा ८४ प ७७३२ नम्बरको मोटरसाइकल मोटरसाइकल दुर्घटना पर्‍यो । ट्राफिक प्रहरीका सहायक निरीक्षक दुर्गादत्त भट्टका अनुसार ठूलो क्षति हुन भने पाएन ।

दुवै बसलाई प्रहरीले नियन्त्रणमा लियो । चेपुवामा परेको मोटरसाइकलका चालक भने सामान्य उपचारपछि घर फर्किए ।

बा ५ ख ७३९५ र बा १ ख ९७३५ नम्बरका ती दुवै बसका चालकको लाइसेन्स जफत  गरिएको छ भने गाडीलाई नियन्त्रणमा लिएर ट्राफिक प्रहरी कार्यालय परिसरमा राखेको छ ।

ललितपुरको हरिहरभवनमा भएको उक्त दुर्घटनाले काठमाडौंको सडकमा अनियन्त्रित रूपमा दौडिने सार्वजनिक सवारी साधनहरू जनताका लागि कति असुरक्षित छन् भन्ने प्रमाणित गरेको छ ।

यहाँसम्म कि सडकको पेटीमा हिँड्ने यात्रुहरू पनि सुरक्षित छैनन् । यसअघि त्यस्ता प्रकारका धेरै दुर्घटनाको साक्षी बनिसकेका छन्, सर्वसाधारण ।