काठमाडौं – भारतको गुजरातमा रहेको शत्रुञ्जय डाँडाको पालिताना मन्दिर पुगेर फर्किनका लागि १५ सय सिँढी चढेका प्रसादको मिर्गौलाले काम गर्न छोडेको छ ।  

ती ४० वर्षीय व्यापारी मुम्बईबाट उक्त मन्दिर पुगेका थिए । तीर्थयात्रा गरेलगत्तै उनी व्यापारिक यात्राका क्रममा स्विट्जरल्यान्ड र फ्रान्स पुगेका थिए । अत्यधिक दबाब परेका कारण उनको मांसपेशीमा चोट लाग्यो र मिर्गौैला फेल भयो । 

‘उनी अस्पतालमा तीन हप्ता बसे र उनीमाथि कैयौं चरणको डायलिसिस चल्यो । अनि थुप्रै औषधि दिएपछि बल्ल उनी निको भए,’ मिर्गौला चिकित्सक हेमाल शाहले बताए ।

प्रसाद (नाम परिवर्तन), कट्टर जैन धर्मावलम्बी हुन् । ‘म डाँडाको टुप्पामा एकचोटि मात्र पुग्ने गर्थें तर यो वर्ष ६५० जनाको समूहसँगै म डाँडामा सातपटक पुगें,’ उनले बताए ।

मन्दिर पुग्न ३.५ किलोमिटरको यात्रा गर्नुपर्छ र दुई घन्टा लाग्छ । ‘पहिलो दिन म सजिलैसँग पुगें तर दोस्रो दिन मलाई त्यहाँ पुग्न तीन घन्टा ४५ मिनेट लाग्यो,’ प्रसादले भने । सातचोटि मन्दिर पुग्न नसक्ने ५० जनामध्ये उनी एक हुन् । 
फर्किएलगत्तै उनी व्यापारिक यात्रामा गए । 

‘मलाई मांसपेशी दुखेको जस्तो लाग्यो तर दुई दिनमा ठीक भइहाल्छु जस्तो पनि लाग्यो,’ उनले भने । तर पेरिसमा उनको नाकबाट रगत बग्यो । घर फर्किंदा उनको मांसपेशीमा ठूलो पीडा भयो र उनले सास फेर्न र पिसाब गर्न सकेनन् । 

उनलाई अस्पताल दौडाइयो र उपचार गरियो । पानी समेत नपिई डाँडा चढेकाले उनको स्वास्थ्य बिग्रेको चिकित्सकले बताएका छन् ।

एजेन्सी