काठमाडौं- आज हरितालिजका तीज, हिन्दू महिलाहरू पतिको दीर्घ जीवनको कामना गर्दै ब्रत बसेर यस पर्वलाई मनाइरहेका छन् । 

तीजमा पीडा, वेदना,सुख र उत्साहका कुरा गीतमा समेट्न चलन पनि छ । त्यसैअनुसार हरेक वर्ष लगभग ५० वटा जति तीज गीतहरू बजारमा भित्रिन्छन् । 

यस वर्ष पनि तीज गीतहरू बजारमा लगभग ५० कै हाराहारीमा भित्रिए । तर आज हामी यस वर्ष दर्शकले मन पराएका ५ वटा तीज गीतबारे चर्चा गर्दैछौं । 

चिटिक्कै भा'छु रे 

सिन्धु मल्लको 'चिटिक्कै भा'छु रे' बोलको गीत यस वर्ष सर्वाधिक हेरिएको गीतको सूचीमा रहेको छ । यस गीतलाई ६६ लाख ६४ हजारभन्दा बढी पटक हेरिएको छ । राजकुमार बगरले लेखेको गीतमा सिन्धु मल्लको स्वर रहेको छ । गीतको भिडियोमा आँचल शर्मालाई देखाइएको छ । 

हामी पनि नाँच्नुपर्छ बीच्चबीच्चमा 

दुर्गेस थापाको 'हामी पनि नाँच्नुपर्छ बीच्चबीच्च' बोलको तीज गीत यसवर्ष सर्वाधिक मन पराइयो । विशेषगरी यस गीतलाई पुरुषहरूले पनि मन पराए । गीतलाई ६४ लाख ३० हजारभन्दा बढी पटक हेरिएको छ । शिव विकको निर्देशनमा बनेको भिडियोलाई मानिसहरूले अत्यन्तै मन पराएका छन् । गीतमा शब्द तथा संगीत पनि दुर्गेश थापाकै रहेको छ । 

अस्ट्रेलिया काण्ड 

तीज गीतमा परिचित नाम हो पशुपति शर्मा । हरेक तीजमा उनले हिट गीत दिइरहेका हुन्छन् ।  पशुपति शर्माको यस वर्षको तीज गीत 'अस्ट्रेलिया काण्ड'लाई दर्शकहरूले मन पराएका छन् । पशुपति शर्मा र सम्झना भण्डारीको स्वरमा रहेको यस गीतलाई ४७ लाखभन्दा बढी पटक हेरिएको छ । यस गीतको शब्द तथा संगीत पशुपति स्वयंको रहेको छ । 

सुहायो चौपट्टै

पशुपति शर्माकै 'सुहायो चौपट्टै' बोलको गीत सार्वजनिक भएको छ । यस गीतलाई पनि दर्शकहरूले मन पराइरहेका छन् । पशुपति शर्माको शब्द तथा संगीत रहेको यस गीतमा शर्माका अलवा राजु ढकाल, देवी घर्ती मगर र सुस्मिता घर्तीको स्वर रहेको छ । यस गीतले ३८ लाखभन्दा बढी भ्यूज पाएको छ । 

पशुपतिमा 

खुमन अधिकारी र रमिला न्यौपानेको स्वरमा 'पशुपतिमा' बोलको गीतलाई पनि दर्शकहरूले रुचाएका छन् । बाबुराम बोहराले लेखेको गीतलाई ११ लाखभन्दा बढी पटक हेरिएको छ । गीतलाई प्रकाश भट्टले निर्देशन गरेका हुन् ।