'झापड'ले तात्यो तालनगरी, भ्रस्टाचारको मुद्दा लगाएर एन्फा अध्यक्ष मिलनलाई फँसाउने मनाङेको चेतावनी

विजय उत्सव
विजय उत्सव

पत्रकार विजय उत्सव लोकान्तरका गण्डकी प्रदेश प्रतिनिधि हुन् ।

गण्डकी प्रदेश सांसद राजीव गुरुङ (दीपक मनाङे) ले एन्फा कास्की अध्यक्षमाथि झापड हानेको विषयले यतिखेर तालनगरी तातेको छ ।

पोखराको लेखनाथमा मंगलबार शुरू भएको गण्डकी प्रदेशस्तरी मुख्यमन्त्री कप लिग फुटबल प्रतियोगिता–२०७६ मा आयोजक एन्फा कास्की अध्यक्ष मिलन गुरुङमाथि मनाङेले हातपात गरेका थिए ।


Advertisement

घटनाको भोलिपल्ट बुधबार दुवैले पोखरामा छुट्टाछुट्टै पत्रकार सम्मेलन गरी आरोप–प्रत्यारोपमा उत्रे । बिहान एन्फा अध्यक्ष गुरुङले आफूमाथि बिनाकारण हातपात भएको भन्दै सांसद मनाङेविरुद्ध कानुनबमोजिम जाने चेतावनी दिँदा साँझ सांसद मनाङेले पत्रकार सम्मेलन गरी एन्फा अध्यक्षले भ्रष्टाचार गरेको आरोप लगाए ।

उनले भने, ‘ठगलाई मैले झापड नहानेर माला लगाइदिउँ ? यस्तो मान्छेलाई तपाईहरुले पनि झापड हान्ने हो, मैले पनि हान्ने हो ।’


Advertisement

झापड हानेको विषयमा बढी चर्चा भएकोमा आपत्ति जनाउँदै उनले झापड हानेको विषय आफूलाई निकै राम्रो लागेको दाबी गरे । ‘झापड हानेको तपाईहरुलाई मन परेन ? राम्रो कुरा हो । तपाईहरु गान्धीतिरको हुनुहुँदो रहेछ, म चाँहि रावणतिर परे,’ उनले भने, ‘तपाईलाई नराम्रो लागेको छ भने लेख्नोस् न यार ।’

एन्फा अध्यक्षले आफूविरुद्ध उत्रिए आफूले पनि ठगीका दर्जनौं मुद्दा दिएर फसाउन सक्ने सांसद मनाङले चेतावनी दिए ।

सांसदद्वारा आयोजक अध्यक्षमाथि नै मुक्का प्रहार हुनुको मुख्य कारण भने खेलाडी व्यवस्थापनमा चासो नभएको भनिएको छ ।

सांसद मनाङेले प्रतियोगितामा मनाङबाट भाग लिएको टिमको खानपान, बसोबास तथा खेल तयारी व्यवस्थापनमा एन्फा कास्की अध्यक्षले चासो नदिएको हुँदा मुक्का हानेको बताएका छन् ।

यता, एन्फा कास्की अध्यक्ष मिलन गुरुङले पत्रकार सम्मेलनमा गेम बिफोर (अगाडि) र गेम अफ्टर (पछाडि) एक दिनको व्यवस्थापन गर्न सकिने तर एक साताअघि देखि आफूहरुले टिमको लागि खर्च गर्न नसक्ने बताए । खेलका लागि मनाङको टोली गतसाता नै पोखरा आएको थियो । जबकि उसको खेल बुधबार (आज) मात्र थियो ।

लेखनाथको भण्डारढिक खेल मैदानमा मंगलबार मुख्यमन्त्री पृथ्वीसुव्वा गुरुङले खेल उद्घाटन गरेका हुन् । ९ टिमले भाग लिएको प्रतियोगितामा विजेताले ५ लाख र उपविजेताले ३ लाखसहित ट्रफि मेडल र प्रमाणपत्र प्राप्त गर्नेछन् ।

गण्डकीमा पहिलो पटक भएको मुख्यमन्त्री कपको लागि प्रदेश सरकारले ४० लाख दिने आश्वासन दिएको खेल संयोजक कृष्ण थापाले जानकारी दिए ।

  

विजय उत्सव
विजय उत्सव

लेखकबाट थप...

कमेन्ट गर्नुहोस्