ललितपुर महानगरपालिकाले महिलाको पाठेघरको मुखमा हुने क्यान्सरको प्रारम्भिक परीक्षण (स्क्रिनिङ) सेवा शुरू गरेको छ।

ललितपुरको १४ नम्बर वडा कार्यालयको 'परिवार नियोजन संस्थागत क्लिनिक'मा आयोजित एक कार्यक्रमका बीच बुधवार स्क्रिनिङ सेवाको शुभारम्भ गरिएको हो ।​​

स्क्रिनिङका साथै उपचार गर्नुपर्ने अवस्थाका महिलाहरूलाई नेपाल क्यान्सर केयर फाउण्डेशनको प्राविधिक सहयोगमा नि:शुल्क उपचार गर्ने महानगरले जनाएको छ ।​​

महानगरका अनुसार स्क्रिनिङ एचपीभी डीएनए प्रविधिबाट हुनेछ ।​

स्वास्थ्य तथा जनसंख्या मन्त्रालय, परिवार कल्याण महाशाखाका प्रमुख डा विवेककुमार लालले सरकारले यसै वर्षको अन्त्यसम्ममा ४५ हजारभन्दा बढी महिलाहरूको एचपीभी डीएनए प्रविधिबाट​ परीक्षण गर्ने लक्ष्य लिएको जानकारी दिए।

त्यस्तै आगामी वर्षमा स्क्रिनिङ सेवालाई थप बढाउँदै लैजाने उनको भनाइ थियो ।

आर्थिक वर्ष २०८०/८१ भित्र थप २९ वटै वडाहरूमा यो सेवा प्रदान गरिने योजना रहेको ललितपुर महानगरका प्रवक्ता राजु महर्जनले जानकारी दिए। 

'पाठेघरको मुखको क्यान्सरको प्रारम्भिक परीक्षण तथा उपचार सबैको पहुँचमा पुर्‍याएर जनचेतना बढाउने उद्देश्यले यो योजनाको शुरूवात गरिएको हो', महानगरका प्रवक्ता महर्जनले भने।

स्क्रिनिङ परीक्षण सेवालाई आगामी आर्थिक वर्षबाट सातै प्रदेशमा विस्तार गर्ने सरकारको योजना छ ।​

भिडियो