‘नाइन्टी एयर्स प्लस भेट्रान’ राष्ट्रिय ब्याडमिन्टन प्रतियोगितामा विमल गौतम र सुदीप योञ्जनको जोडी प्रथम भएको छ । शनिवार ललितपुरको रिभाइभ लिजर पार्कमा भएको प्रतियोगितामा गौतम–योञ्जनको टिमले दिलबहादुर कन्दन्वा र राजेन्द्र महर्जनको टोलीलाई पराजित गरेको हो । 

गौतम–योञ्जनको टिमले २१, १९ तथा २१, १५ को सोझो सेटमा पराजित गरेको प्रतियोगिताका संयोजक शुक्र पाख्रिनले जानकारी दिए । प्रतियोगितामा प्रथम हुने टिमले २० हजार नगदसहित कप र मेडल प्राप्त गरेको छ ।

प्रतियोगितामा दिलबहादुर कन्दन्वा र राजेन्द्र महर्जनको टोली दोस्रो भएको छ । दोस्रो हुने टोलीले १० हजार नगद सहित कप र मेडल पुरस्कार प्राप्त गरेको छ । 

प्रतियोगितामा दत्तबहादुर थापा र सुरन आलेको टिम तृतीय भएको छ । टोलीले ५ हजार नगदसहित कप र मेडल प्राप्त गरेको छ । प्रतियोगितामा सहभागी हुने खेलाडी ४० वर्ष उमेर पुगेको तथा दुई जनाको टोलीको उमेर ९० वर्ष भन्दा माथि हुनुपर्ने थियो । 

गण्डकी प्रदेश सभाका सदस्य लीला थापा मगर प्रमुख अतिथि रहेको समारोहमा विजयी खेलाडीलाई बागमती प्रदेश ब्याडमिन्टन संघका अध्यक्ष रुद्र थिङ, समाजसेवी सानु लामा लगायतले पुरस्कार वितरण गरेका थिए । शुक्र पाख्रिनको संयोजकत्वमा सम्पन्न प्रतियोगितामा २४ टिम सहभागी थिए ।