बिरामीको मृत्युपछि कोशी अस्पताल तनावग्रस्त

विराटनगरस्थित कोशी अस्पतालमा उपचारको क्रममा एकजना बिरामीको मृत्यु भएपछि अस्पताल परिसर तनावग्रस्त भएको छ ।

विराटनगर– ६ घर भएकी ७२ वर्षीया समसा बेगामको शुक्रबार दिउँसो उपचारको क्रममा मृत्यु भएपछि तनावको अवस्था सिर्जना भएको हो ।

स्थिति नियन्त्रणमा लिन ठूलो संख्यामा प्रहरी परिचालन गरिएको छ ।  

बेगमका आफन्तले उपचारमा ढिलासुस्ती गरिएको तथा आईसीयूमा नराखी उपचार गरेका कारणले उनको मृत्यु भएको आरोप लगाउँदै अस्पतालमा नाराबाजी गरेका छन् । उपचारमा ढिलाइ गर्ने चिकित्सक र नर्सलाई कारबाही गरिनुपर्ने माग राख्दै उनीहरू प्रदर्शनमा उत्रिएका हुन् ।  श्वासप्रश्वासमा समस्या भएपछि बेगामलाई शुक्रबार दिउँसो कोशी अस्पतालको आकस्मिक कक्षमा उपचारका लागि ल्याइएको थियो । 

आकस्मिक कक्षमा खटिएका चिकित्सकले तत्काल आईसीयूमा राखेर बिरामीको उपचार गरिनुपर्ने सुझाब दिए । बिरामीलाई आईसीयूमा राखेर उपचारका लागि रिफर पनि गरिदिए । तर, आईसीयू खाली नभएपछि चिकित्सकले अन्यत्र लैजान सिफारिस गरेका थिए ।

१२ बेडको कोशी अस्पतालको आईसीयू अहिले भरिने गरेको छ । आकस्मिक रुपमा शल्यक्रिया गरेर राखिने बिरामीका आईसीयूमा दुईवटा बेड छुट्याएको हुन्छ । इमरजेन्सीबाट प्रसूति वार्ड र सर्जरीबाट आएका बिरामीका लागि भनेर दुईवटा बेड आईसीयूमा राखिएको हुन्छ । उक्त बेडमा नराखी उपचार गर्दा बेगामको ज्यान गएको परिवारको आरोप छ ।

समयमै आईसीयूमा लगेर उपचार नगर्ने चिकित्सक र स्वास्थ्यकर्मीहरूलाई कारबाही गरिनुपर्ने माग राख्दै मृतकका आफन्तले शव बुझेका छैनन् । अस्पताल प्रशासनले उपचारमा ढिला सुस्ती गर्ने चिकित्सक र स्वास्थ्यकर्मीलाई कारबाही गरेपछि मात्रै शव बुझ्ने परिवारको भनाइ छ ।  साँझसम्म पनि आफन्त कोशी अस्पतालमा धर्ना दिएर बसेका छन् ।