काठमाडौं– चौधरी फाउण्डेसनले नेपालमा कृतिम खुट्टा वितरण शुरू गरेको छ ।

दुर्घटना वा अन्य कुनैपनि कारण खुट्टा गुमाएका नागरिकलाई फाउण्डेसनले कृत्रिम खुट्टा वितरण शुरू गरेको हो ।

आईतबार काठमाडौंको नर्भिक इन्टरनेशनल अस्पतालमा आयोजित कार्यक्रममा उपप्रधान एवं स्वास्थ्य तथा जनसंख्या मन्त्री उपेन्द्र यादव र चौधरी फाउण्डेसनका अध्यक्ष विनोद चौधरीले कृतिम खुट्टा वितरण कार्यक्रमको औपचारिक सुरुवात गरे ।

उक्त अवसरमा नेपालका लागि भारतीय राजदूत मन्जिवसिंह पुरी, भगवान महाविर विकलांग सहायता समिति (विएमभिएसएस)का फाउण्डर डा. डिआर मेहता, समितिका निर्देशक शतिस मेहता लगायतका महानुभावहरूको पनि उपस्थिती रहेको थियो ।

फाउण्डेसनले विएमभिएसएससँगको सहकार्यमा नेपालमा कृतिम खुट्टा वितरण गर्ने कार्यक्रम कार्यान्वयनमा ल्याएको हो ।

पहिलो चरणमा काठमाडौंको नर्भिक अस्पतालमा सोमबारसम्म र दोस्रो चरणमा नवलपुरको गैंडाकोटस्थित सहज अस्पतालमा आगमाी ३ माघदेखि ४५ दिन सम्मका लागि यो सेवा उपलब्ध हुने फाउण्डेसनले जानकारी दिएको छ । 

दुवै ठाउँबाट ५ सय व्यक्तिहरूका लागि कृतिम खुट्टा उपलब्ध गराउने योजना फाउण्डेसनको रहेको छ । यो सेवा पूर्ण रुपमा निःशुल्क उपलब्ध गराइने समेत फाउण्डेसनले स्पष्ट पारेको छ ।