सुर्खेत – कर्णाली प्रदेशको राजधानी वीरेन्द्रनगरबाट जिल्ला प्रहरी कार्यालयको टोलीले भ्रष्टाचारविरुद्धको अभियन्ता भन्दै सार्वजनिक रुपमा गालीगलौच गरेको अभियोगमा ज्ञानेन्द्र शाहीलाई बुधवार पक्राउ गरेको छ ।

पत्रकारलाई ‘दलाल र कुकुर’ भन्दै अनलाइनमा अन्तर्वार्ता दिने जुम्लाका ज्ञानेन्द्र शाहीलाई बुधबार पक्राउ गरिएको हो ।

शाहीले गत वैशाख १८ गते आफ्नो पत्रकार सम्मेलनमा नआएको भन्दै सुर्खेत र कर्णालीका पत्रकारलाई गालीगलौज गर्दै भिडियो पोस्ट गरेका थिए । त्यसको २ दिनपछि उनले आफ्नो फेसबूक लाइभमा थप अपशव्द प्रयोग गर्दै पत्रकारलाई भ्रष्टाचारीको मतियार भएको आरोप लगाएका थिए ।

सामाजिक सञ्जालमा समेत पत्रकारलाई तथानाम आरोप लगाएको बताउँदै नेपाल पत्रकार महासंघ कर्णाली प्रदेश र जिल्ला शाखा सुर्खेतले संयुक्त रुपमा शाहीविरुद्ध साइबर अपराध गरेको भन्दै आवश्यक कारवाहीका लागि उजुरी दर्ता गरेका थिए ।

‘हामीले लामो समयदेखि ज्ञानेन्द्र शाहीलाई खोज्दै आएका थियौं । आज खुलामञ्चमा आएको भन्ने सूचनाका आधारमा उनलाई नियन्त्रणमा लिन त्यहाँ गएका थियौं,’ जिल्ला प्रहरी कार्यालय सुर्खेतका प्रहरी नायव उपरीक्षक प्रदीपबहादुर क्षेत्रीले भने, ‘शान्तिपूर्ण रुपमा हामीले शाहीलाई पक्राउ गर्न खोज्दा हामीमाथि नै आक्रमण भएको छ । हाम्रा ५ जना घाइते भएका छन् ।’

उनका अनुसार घाइते हुनेमा प्रहरी निरीक्षक निरञ्जन घिमिरे, हवल्दार प्रकाश बुढा, जवानहरू रामप्रसाद बर्मा, जीतबहादुर बोहोरा र हस्तसिंह छन् ।

डीएसपी क्षेत्रीका अनुसार अहिले शाहीसहित अन्य ६ जनालाई नियन्त्रणमा लिएको र थप अनुसन्धान भइरहेको छ । शाहीलाई काठमाडौं पठाइएको छ भने अन्यलाई सार्वजनिक मुद्दा लगाइने प्रहरीले जनाएको छ ।