काठमाडौं – भारतीय जनता पार्टीका सांसद ओम बिडला लोकसभाका अध्यक्ष छानिएका छन् । 

भारतका प्रधानमन्त्री नरेन्द्र मोदीले उनको नाम प्रस्ताव गरेपछि अनेकौं सांसदले उनलाई समर्थन दिए । त्यसपछि मोदी आफैंले बिडलालाई अध्यक्षको कुुर्सीसम्म लगे । 

राजस्थानको कोटा–बूँदी संसदीय क्षेत्रबाट छानिएका सांसद बिडलाले मंगलवार आफ्नो नामांकन पत्र दर्ता गरेका थिए ।

बिडलालाई राष्ट्रिय स्वयंसेवक संघले मन पराएको मानिन्छ । मोदी र अमित शाहसँग पनि उनको निकट सम्बन्ध छ । 

सन् २०१४ को लोकसभामा ओम बिडलालाई अनेकौं संसदीय समितिमा स्थान दिइएको थियो । 

बिडलालाई अध्यक्ष बनाइनुमा भाजपाको सामाजिक समन्वय पनि एक कारण हो । बिडला महाजन समुदायका मानिस हुन् । महाजन समुदाय भाजपाको परम्परागत भोट बैंक हो । मोदी सरकारको अघिल्लो कार्यकालमा मध्य प्रदेशकी सुमित्रा महाजनलाई लोकसभा स्पीकर छानिएको थियो । 

राजस्थानबाट केन्द्रमा मन्त्रीको संख्या कमै रह्यो । अघिल्लोपटक राजस्थानका ६ सांसदहरूलाई मन्त्री बनाइएको थियो तर यसपालि जम्मा तीन मन्त्री दिइयो । राजस्थानले लगातार दोस्रोपटक भाजपालाई सबै २५ सीट दियो । त्यसैले गर्दा पनि त्यहाँका सांसदलाई लोकसभा अध्यक्ष बनाइएको हो ।

एजेन्सी