पोखरा–नेपाल कम्युनिस्ट पार्टी (नेकपा)का अध्यक्ष पुष्पकमल दाहाल प्रचण्डले पार्टी एकताका क्रममा भएको सरकार आलोपालो गर्ने सहमति बदलिएको परिस्थितिमा फेरबदल हुनसक्ने बताएका छन् । 

बिहीवार कास्कीको पोखरामा पत्रकारहरूसँग कुरा गर्दै अध्यक्ष प्रचण्डले आलोपालो सरकारको नेतृत्वबारे आफूले बोल्नुभन्दा पहिलै सहमति सार्वजनिक भइसकेको समेत प्रस्ट पारे ।

‘हिजो जे सुकै सहमति भएको भएपनि बदलिएको परिस्थितिमा सरकार पाँचै वर्ष जान सक्छ भनेको थिएँ, मैले भन्न खोजेको चुरो कुरा भाँचियो,’ प्रचण्डले भने । 

पार्टी सञ्चालन र सरकार सञ्चालनबारे एकता गर्दाको समयमा भइसकेका सहमति आफू बोल्नुभन्दा पहिलै सार्वजनिक भइसकेको तथ्य नबिर्सन प्रचण्डले आग्रह गरे । 

‘त्यो बहस मैले भनेर शुरू भयो जस्तो गरी प्रचार गरियो, त्यो सत्य होइन । त्यसमा कोही न कोही खेल्न खोजेको जस्तो देखियो,’ उनले थपे । 

प्रचण्डले नेकपाका नेताहरूबीच असमझादारी नभएको समेत दाबी गरे । ‘अहिले पनि राम्रैसंग छलफल गरिरहेका छौं, दुई धारमा रहेको यति ठूलो पार्टीलाई मिलाउने कुरा आफैँमा ऐतिहासिक हो । दुई तिहाइको महत्त्वलाई बुझेका छौं । सरकारलाई सफल बनाउने कुरा राष्ट्रको स्वाधीनताका लागि अनिवार्य शर्त हो,’ प्रचण्डले भने । 

‘मन्त्रीमण्डल हेरफेर हुनसक्छ’ 

प्रचण्डले प्रधानमन्त्री केपी शर्मा ओली नेतृत्वको मन्त्रीमण्डलमा हेरफेर हुनसक्ने संकेत गरेका छन् । 

यसबारे प्रधानमन्त्रीसँग आफ्नो छलफल भएको र बजेट पारित भएपछि मन्त्री फेरिन सक्ने उनले बताए । 

प्रचण्डले सरकारले संसद्मा लगेको मिडिया काउन्सिल विधेयक पनि संशोधन हुने बताए ।