काठमाडौं – क्रिकेट विश्वकपका लीग म्याचहरू आधाउधी सकिएका छन् । अहिलेसम्म टीमहरूले पाएको अंकको आधारमा हेर्ने हो भने दक्षिण अफ्रिका, पाकिस्तान र अफगानिस्तान सेमिफाइनलको दौडबाट बाहिरिइसकेका छन् । 

सेमिफाइनल पुग्नका लागि न्युजील्यान्ड, इंग्ल्यान्ड, अस्ट्रेलिया र भारतको दाबेदारी बलियो छ । भारतले अन्य तीन टीमभन्दा एक म्याच कम खेलेको छ । 

तर बंगलादेश, वेस्ट इन्डीज र श्रीलंका चाहिँ सेमिफाइनलमा पुग्न अझै पनि संघर्ष गरिरहेका छन् । यसपालि राउन्ड रोबिन फर्म्याट अपनाइएकाले सबै टीमले एकचोटि सबैसँग भिड्नुपर्नेछ र शीर्ष चार टोली सेमिफाइनलमा पुग्नेछन् । 

न्युजील्यान्डले पाँच खेलमा नौ अंक ल्याएर शीर्ष स्थान बनाएको छ । ऊ यस प्रतियोगितामा अहिलेसम्म हारेको छैन । ऊ सेमिफाइनल पुग्ने पक्का छ । 

इंग्ल्यान्डले पाँच खेलमा चार जीत र एक हार बेहोरेको छ । उसको कुल आठ अंक छ । उसले श्रीलंका, अस्ट्रेलिया, भारत र न्युजील्यान्डसँग खेल्न बाँकी छ । 

अस्ट्रेलियाले पाँच खेलमा आठ अंक ल्याएको छ । उसले भारतसँग मात्र हार्नुपरेको छ । बंगलादेश, इंग्ल्यान्ड, न्युजील्यान्ड र दक्षिण अफ्रिकासँग अस्ट्रेलियाले खेल्न बाँकी छ । 

भारतले पनि यस प्रतियोगितामा एउटा खेल पनि हारेको छैन । न्युजील्यान्डविरुद्धको खेल वर्षाले हुन सकेन । उसले अस्ट्रेलिया, पाकिस्तान र दक्षिण अफ्रिकालाई हराएको छ । उसले अब अफगानिस्तान, वेस्ट इन्डीज, इंग्ल्यान्ड, बंगलादेश र श्रीलंकासँग खेल्न बाँकी छ । इंग्ल्यान्डविरुद्धको खेल उसका लागि कठिन छ । 

बंगलादेश पाँच म्याचमा पाँच अंकका साथ पाँचौं स्थानमा छ । उसले राम्रा टोलीसँग भिड्न बाँकी नै छ त्यसैले उसको सेमिफाइनल यात्रा कठिन छ । 

श्रीलंकाले पाँच म्याचमा चार अंक मात्र ल्याएको छ । छैठौं स्थानमा रहेको श्रीलंकाले बाँकी चारै खेल जित्नुपर्ने हुन्छ । इंग्ल्यान्ड र भारतविरुद्ध उसले खेल्नै बाँकी छ । त्यसैले उसको चान्स खासै छ ।

वेस्ट इन्डीज चाहिँ सातौं स्थानमा छ । उसले पाँच म्याचमा जम्मा तीन अंक ल्याएको छ । बाँकी चार म्याच उसले जित्नैपर्ने हुन्छ र न्युजील्यान्ड तथा भारतसँग उसको म्याच कठिन हुनेछ । 

आठौं स्थानमा रहेको दक्षिण अफ्रिकाले ६ म्याचमा तीन अंक मात्र ल्याएको छ र सेमिफाइनल दौडबाट बाहिरिइसकेको छ । उसले अब पाकिस्तान, श्रीलंका र अस्ट्रेलियासँग खेल्न बाँकी छ । 

पाकिस्तान टीमले पनि पाँच खेलमा जम्मा तीन अंक ल्याएको छ । इंग्ल्यान्डलाई हराएर प्रतियोगितको शानदार शुरूआत गरेको पाकिस्तानले त्यसपछि अत्यन्तै खराब प्रदर्शन गर्दै गयो । अब बाँकी म्याचहरू जितेर आत्मसम्मान फर्काउने विकल्प मात्र छ पाकिस्तानलाई, सेमिफाइनल दौडबाट ऊ बाहिरिइसकेको छ । 

अफगानिस्तान यस प्रतियोगिताको सबभन्दा निरीह टोली बनेको छ । उसले पाँच खेल खेलेकोमा पाँचैवटामा हार बेहोरेको छ । उसले भारत, बंगलादेश, पाकिस्तान र वेस्ट इन्डीजविरुद्ध खेल्न बाँकी छ र कम्तीमा एउटा खेल जितेर आत्मसम्मान जोगाउन खोजेको छ ।

एजेन्सी