काठमाडौं – प्रधानमन्त्री केपी शर्मा ओलीको राजीनामाको प्रसंग उठाएर प्रमुख प्रतिपक्षी दल नेपाली कांग्रेसले देशमा अस्थीरता उत्पन्न गर्न खोजेको सत्तारुढ दल नेकपाका प्रमुख सचेतकले आरोप लगाएका छन् । 

प्रतिनिधि सभामा बिहीवारको बैठकमा विनियोजन विधेयकमाथिको छलफलका क्रममा नेकपा सचेतक देव गुरुङले प्रमुख प्रतिपक्षी दलका उपनेताले प्रधामनन्त्रीले राजीनामा दिनुपर्छ भनेर दिएको अभिव्यक्तिप्रति आपत्ति जनाएका हुन् ।

बिहीवारको बैठकमा कांग्रेस संसदीय दलका उपनेता विजयकुमार गच्छदारले गुठी विधेयक फिर्ता गर्ने ओलीले नैतिकताको आधारमा राजीनामा दिनुपर्ने बताएका थिए ।

‘कतिपय शक्ति केन्द्र एकले अर्कोलाई निषेध गर्ने परिस्थिति देखा परेको छ, प्रतिपक्षी दलका नेताले प्रधानमन्त्रीले राजीनामा दिनुपर्छ भनेर भर्खरै भन्नुभयो,’ गुरुङले भने, ‘नेपाल अस्थीरता र अराजकतातर्फ गयो भने सामान्य सरकार फेरबदल मात्र होइन नेपालको स्वाधीनता खतरामा पर्नेछ । नेपाललाई विदेशीको क्रिडास्थल बनाउन प्रतिपक्ष कारण नबनोस् ।’

नेता गुरुङले सत्तापक्षका सांसदले राज्यका कामको प्रक्रियामा स्थीरता र सरल प्रक्रियामा लैजान जरुरी रहेको बताए ।

‘एकले अर्कोलाई निषेध गर्दा देश विदेशी शक्तिको क्रिडास्थल बन्न सक्छ । वर्तमान सरकार राष्ट्रवादी सरकारको रूपमा पहिचान छ । राज्यका अंगलाई एकीकृत तथा समाज र दललाई एकीकृत गरेर जानुपर्छ,’ उनले भने ।

नेता गुरुङले राजनीतिक स्थीरता र सहमतीय प्रणालीमा जानका लागि राष्ट्रपतीय प्रणाली र समानुपतिक निर्वाचन प्रणालीमा जानु पर्ने तर्क गरे ।