काठमाडौं – प्रधानमन्त्री रोजगार कार्यक्रमको नाममा कार्यकर्ता पालेर राज्यकोषको दुरुपयोग भएको भन्दै छानबिन गर्न विपक्षी दलका सांसद माग गरेका छन् ।

प्रतिनिधि सभाको सोमवार बसेको बैठकको शून्य समयमा नेपाली कांग्रेसका सांसद प्रकाश रसाइली स्नेहीले छानबिनको माग गरेका हुन् ।

‘प्रधानमन्त्री रोजगार कार्यक्रम शुरू हुँदा युवालाई सीपसहित रोजगारी सिर्जना हुने लागेको थियो, कार्यान्वयनमा पुग्दै गर्दा युवाहरूलाई पहेलो ज्याकेट टोपी र जुत्ता दिएर गाउँमा बादर धपाउने र भुस्याहा कुकुर धपाउने काम भयो,’ उनले सदनमा भने, ‘प्रधानमन्त्री रोजगार कार्यक्रम व्यापक दुरुपयोग भएको छ । पार्टीका कार्यकर्ता पाल्ने कामामा रुपान्तरण भएको छ । विदेशमा भएका नेपाली नेपाली युवाले चासो लिएका छन् । केवल यो कार्यक्रम पार्टीका अरिंगाल पाल्नेमा सीमित भएको छ । कहाँ–कहाँ दुरुपयोग भयो छानबिन गर्नुपर्छ ।’

प्रतिपक्षी दलका सांसदले प्रधानमन्त्री रोजगार कार्यक्रमको दुरुपयोगबारे दैनिक संसदमा बोल्ने गरेका छन् ।