कर्णालीमा अझै ३० हजार बालबालिका विद्यालयबाहिर

प्रतीकात्मक तस्वीर
भदौ ३०, २०७६

सुर्खेत - कर्णाली प्रदेशका ६७ प्रतिशत बालबालिकाहरूले कुनै न कुनै रूपमा श्रम गरिरहेको तथ्यांक बाहिरिएको छ । कर्णाली प्रदेशको सामाजिक विकास मन्त्रालयको एक तथ्याङ्कअनुसार कर्णाली प्रदेशका ६७ प्रतिशत वालवालिकाहरुले कुनै न कुनै रुपमा श्रम गरिरहेको पाइएको हो ।

मन्त्रालयको उक्त तथ्यांकअनुसार विशेषगरी १५ वर्षमुनिका ६७ प्रतिशत बालबालिका श्रम शोषणमा परेको देखिएको छ । मन्त्रालयका बालअधिकार अधिकृत डम्बर रोकायका अनुसार २४ प्रतिशत बालबालिकाहरु आर्थिक गतिविधिमा र ४३ प्रतिशत बालबालिकाहरु अन्य श्रममा संलग्न रहेका पाइएको हो ।


ADVERTISEMENT

‘सडक बालाबालिका पनि धेरै संख्यामा रहेका छन्,' उनले भने, 'त्यस्तै बालबिबाह गर्नेहरुको संख्या पनि उस्तै रहेको छ । कर्णाली प्रदेशका विभिन्न जिल्लाका बालबालिका श्रम गर्न भारत लगायतका मुलुकहरुमा जाने धेरै पाइन्छ । उनीहरू भारत लगायतका मुलुकमा परिवारसँगै जाने श्रम गर्ने गर्छन् ।’

कर्णाली प्रदेशमा अझै पनि करिब ६ प्रतिशत बालबालिका विद्यालयबाहिर रहेको सामाजिक विकास मन्त्रालयको सोही तथ्यांकमा उल्लेख गरिएको छ । विद्यालय बाहिर रहनेमा कर्णाली प्रदेशको हिमाली जिल्लाका बालबालिका धेरै रहेका छन् ।

त्यो संख्या करीब ३० हजारको हाराहारीमा छ । मन्त्रालयले बालबालिकालाई विद्यालय ल्याउन विभिन्न कार्यक्रमहरु संचालन गरिहरहेको भएपनि त्यो त्यति उपलब्धिमूलक नदेखिएको सरोकारवालाहरुको गुनासो रहेको छ ।

बालबालिकाको क्षेत्रमा काम गर्ने सरकारी मात्र हैन धेरैको संख्यामा गैरसरकारी संस्थाहरु पनि रहेका छन् । कर्णाली प्रदेशमा यिनै सरकारी र विभिन्न गैरसरकारी क्षेत्रबाट बालबालिकाको क्षेत्रमा धेरै रकम खर्चिए पनि उपलब्धि त्यति सन्तोषजनक नदेखिएको सामाजिक विकास मन्त्रालयको सोही तथ्यांकबाट प्रष्ट हुन्छ ।

 

भदौ ३०, २०७६ मा प्रकाशित

शेरबहादुर थापा

थापा लोकान्तरकालागि कर्णाली प्रदेशका प्रतिनिधि हुन् ।

लेखकबाट थप...

प्रतिक्रिया दिनुहोस