गण्डकी प्रदेशका मुख्यमन्त्री पृथ्वीसुब्बा गुरुङले कोरोना भाइरसको संक्रमणको जोखिमबाट सुरक्षित रहन सर्वसाधारणलाई सचेतना जगाउन पार्टीमा सबै सदस्य लाग्न आह्वान गरेका छन् ।

नेपाल कम्युनिस्ट पार्टी (नेकपा) जिल्ला कमिटीले शनिवारदेखि शुरू गरेको ३ महिने जनसम्बन्ध विस्तार तथा संगठन सुदृढीकरण अभियानको पोखरामा शुभारम्भ गर्दै उनले पार्टीका अभियान र कोरोनाविरुद्धको सचेतनालाई सँगसँगै लैजान कार्यकर्तालाई निर्देशन दिए ।

पार्टीका स्थायी कमिटी सदस्य एवं गण्डकी प्रदेशका इन्चार्ज समेत रहेका मुख्यमन्त्री गुरुङले पार्टीले शुरू गरेको अभियानमा प्रत्येक घरघरमा पुगेर व्यक्ति–व्यक्तिलाई भेटेर सचेतनाका लागि आग्रह गरिने र  संघीय सरकारसँग प्रदेश सरकार पनि कोरोना विरुद्धको अभियानमा एक साथ अघि बढेको स्पष्ट पारे ।

पार्टीका जिल्ला अध्यक्ष एवं गण्डकी प्रदेशसभा सदस्य कृष्ण थापाले जिल्लाका ७२ वटै वडामा एकैपटक अभियानको शुभारम्भ गरिएको जानकारी दिए ।

उनले कोरोना सचेतनासँगै अभियानका क्रममा यसै महिनाभित्रमा पार्टी सदस्यता नवीकरण, संघ, प्रदेश तथा स्थानीय तहको निर्वाचनका बेला जनतामाझ गरेका प्रतिबद्धता पूरा गर्न लाग्ने जानकारी दिए । अध्यक्ष थापाले स्थानीय सरकारका कामलाई थप प्रभावकारी बनाइने तथा बाँकी रहेको जनवर्गीय संगठनको एकीकरणको कामलाई समेत ३ महिने अभियानका क्रममा सम्पन्न गरिने जानकारी दिए । सो अभियान आगामी जेठ मसान्तसम्म सञ्चालन हुने बताइन्छ ।