उत्पादकत्व बढाउने गरी बजेट ल्याउन सरकारलाई सामाजिक विकास समितिको निर्देशन

कर्णाली प्रदेश सभाको सामाजिक विकास समितिको बैठकले सरकारलाई उत्पादकत्व बढाउने बजेट ल्याउन निर्देशन दिएको छ ।

बुधवार कर्णाली प्रदेशसभा अन्तर्गत गठित सामाजिक विकास समितिको भर्चुअल बैठकले बजेटबारे निर्देशक दिएको समितिका सचिव राजेन्द्र पौडेलले जानकारी दिए । 

‘बैठकमा कृषि उत्पादकत्व वृद्धि गरी कर्णाली प्रदेशलाई कसरी कृषिमा आत्मनिर्भर गराउन सकिन्छ भन्ने विषय र आगामी वर्षको नीति तथा कार्यक्रम र बजेटमा सामाजिक विकास मन्त्रालय र भूमि व्यवस्था, कृषि तथा सहकारी मन्त्रालयले तय गर्नुपर्ने विशेष कार्यक्रमका विषयमा छलफल भयो । आगामी बैठकमा समितिको क्षेत्राधिकारभित्र पर्ने दुवै मन्त्रालयका मन्त्रीलाई बैठकमा बोलाउने निर्णय हुनुका साथै प्रत्यायोजित विधायनका सम्बन्धमा र समितिमा विचाराधीन रहेको स्वास्थ्य सेवा विधेयकमाथि विषय विज्ञसँग परामर्श गरी विधेयकलाई समयअनुकूल बनाउने निर्णय भएको छ,’ उनले भने, ‘बैठकमा कोरोना महामारीको कारणबाट मुलुक लकडाउनमा रहेको अवस्थामा महामारी नियन्त्रण तथा व्यवस्थापन कार्यमा संसदीय समितिको भूमिका अझ क्रियाशील हुनुपर्ने विषयमा व्यापक छलफल भएको छ ।’

सामाजिक विकास समितिका अध्यक्ष राजु नेपालीको अध्यक्षतामा बसेको बैठकमा कृष्णा शाह, कौशिलावती खत्री, ठम्मरबहादुर विष्ट, पदमा खड्का, यज्ञबहादुर बिसी, रातो कामी र सुशीलकुमार थापाले सहभागिता जनाएका थिए ।

सामाजिक विकास समितिको अर्को बैठक सामाजिक विकास मन्त्री र भूमि व्यवस्था, कृषि तथा सहकारी मन्त्रीसँग समन्वय गरी यथाशक्य छिटो बस्ने निर्णय भएको समितिका सचिव राजेन्द्र पौडैल जानकारी दिए ।