नयाँ नक्सा अनुसार नेपालको निशान छाप संशोधनका लागि सरकारले संसद सचिवालयमा दर्ता गरेको संविधान संशोधन विधेयक आजदेखि प्रक्रियामा जाने भएको छ । यसअघि १४ गते बुधवार प्रतिनिधिसभा बैठकको कार्यसूचीमा राखिएको संविधान संशोधन विधेयक पेश गर्ने प्रस्ताव कार्यसूचीबाट हटाइएको थियो ।

आइतवार बिहान ११ बजे बस्ने प्रतिनिधि सभा बैठकमा कानून न्याय तथा संसदीय व्यबस्था मन्त्री डा शिवमाया तुम्वाहाम्फेले विधेयक पेश गर्ने सम्भावित कार्यसूची हिजो नै प्रकाशित भएको थियो ।  संघीय संसद सचिवालय स्रोतका अनुसार आइतवारको बैठकमा नेपालको संविधान (दोस्रो संशोधन विधेयक) २०७७ माथि अनुमति माग्ने प्रस्ताव पेश गर्ने कार्यसूची छ । 

प्रमुख प्रतिपक्षी दल नेपाली कांग्रेसले समय मागेका कारण यसअघि संविधान संशोधन विधेयक कार्ययूचीबाट हटाइएको थियो । शनिवार बसेको काग्रेस केन्द्रीय समिति बैठकले संविधान संशोधनको पक्षमा मतदान गर्ने निर्णय गरेको थियो । संविधान संशोधन विधेयक फाष्ट ट्याकबाट पारित गराउने सरकारको तयारी छ ।  

संविधान संशोधन विधेयक सर्वसम्मत पारित गराउने प्रयास स्वरुप प्रधानमन्त्री केपी शर्मा ओलीले मंगलवार सर्वदलीय बैठक राखेका थिए । जेठ ६ गते सरकारका नीति तथा कार्यक्रम माथिको छलफलमा सांसदले उठाएका प्रश्नको जवाफ दिने क्रममा ओलीले संविधान संशोधन विधेयक पारित भएको दिन मुलुकमा दीपावली हुने बताएका थिए । 

सरकारले अघिल्लो शुक्रवार संसद सचिवालयमा संविधान संशोधन विधेयक दर्ता गराएको थियो । भारतले अतिक्रमण गरेको कालापानी, लिपुलेक र लिम्पियाधुरालाई नेपालको नक्सामा समेटि सरकारले गत जेठ ५ गते नयाँ नक्सा प्रकाशित गरेको थियो । 

आइतवार बजेटमाथिको छलफल शुरु हुनु अघि नै विधेयक टेवुल गर्ने कार्यसूची छ । गत आइतवार बसेको कार्यव्यबस्था परामर्श समितिले विधेयक परिपक्क भएपछि प्रक्रियामा लैजाने निर्णय गरेको थियो ।