नेपालमा शनिवार थप ३२३ जनामा कोराना भाइरस संक्रमित पुष्टि भएको छ ।

कोरोना संक्रमणको अद्यावधिक विवरण सार्वजनिक गर्दै स्वास्थ्य तथा जनसंख्या मन्त्रालयका प्रवक्ता डा. विकास देवकोटाले शनिवार थपिएका संक्रमितमध्ये २८६ पुरुष र ३७ महिला रहेका जानकारी दिए । 

यससँगै देशभर कोरोना संक्रमितको संख्या ३ हजार २३५ पुगेको छ । प्रवक्ता डा. देवकोटाका अनुसार अस्पतालबाट पछिल्लोपटक थप ३२ जना गरी ३६५ जनालाई डिस्चार्ज गरिएको छ ।

तर कोरोना निको नहुँदै डिस्चार्ज गर्ने गरिएकाले यो सबै संख्या निको हुनेको संख्या भने होइन । सरकारको पछिल्लो निर्देशिका अनुसार कोरोना निको नहुँदै अस्पतालबाट डिस्चार्ज गर्ने गरिएको छ ।

संक्रमितमध्ये प्रदेश १ मा २४९, प्रदेश २ मा १ हजार ७७, बागमतीमा ९०, गण्डकीमा ७३, प्रदेश ५ मा १ हजार ६१, कर्णालीमा ५७९, सुदूरपश्चिममा १०६ जना रहेका छन् । 

मन्त्रालयले देशभर ७० जिल्लामा कोरोना संक्रमण पुगेको जानकारी दिएको छ ।