ताइवानको परराष्ट्र मन्त्रालयले सोमवार एक बयान जारी गर्दै तिब्बती धर्मगुरु दलाई लामालाई स्वागत गर्ने जनाएको छ । दलाई लामा ताइवान गए भने बेइजिङ आक्रोशित हुने पक्का छ किनकि चीनको नजरमा उनी खतरनाक पृथक्तावादी हुन् ।

दलाई लामा पछिल्लोपटक सन् २००९ मा ताइवान पुगेका थिए तर बहालवाला राष्ट्रपति त्साई इङ–वेनको शासनकालमा उनी त्यहाँ पुगेका छैनन् । 

दलाई लामाको आज जन्मदिन परेको छ र त्यस अवसरमा एउटा भिडियो सन्देश दिँदै उनले ताइवान फेरि जान चाहेको बताएका छन् । 

‘राजनीतिक परिदृश्य परिवर्तन हुँदै जाँदा म फेरि ताइवान भ्रमण गर्न सक्छु । म यसमा आशावादी छु । जे भए पनि मेरो मन तपाईंहरूसँगै छ,’ उनले आफ्नो वेबसाइटमा लेखे । 

ताइवानको परराष्ट्र मन्त्रालयकी प्रवक्ता जोआन ओउले दलाई लामाले भ्रमणका लागि आवेदन नदिएको तर दिएमा सान्दर्भिक नियमअनुसार त्यसलाई अघि बढाउने बताइन् ।

‘हामी पारस्परिक सम्मानको सिद्धान्त र दुवै पक्षको सहजताका आधारमा दलाई लामालाई पुनः ताइवान आएर बौद्ध ज्ञान बाँड्नका लागि स्वागत गर्छौं,’ ओउले भनिन् । 

बेइजिङ ताइवानकी राष्ट्रपतिप्रति गहिरो आशंका राख्छ र उनले ताइवानलाई औपचारिक स्वतन्त्रता दिलाउन खोजेको विश्वास गर्छ । ताइवान स्वतन्त्र देश नै भएको त्साईले बताउँदै आएकी छन् ।