चीनमा एक निजी बिजनेस सर्भेको परिणाम हेर्ने हो भने कोरोनाभाइरस महामारीबाट चीनको उत्पादन क्षेत्र उक्सिरहेको पाइएको छ । सन् २०११ को जनवरी महिनादेखि यो सबभन्दा बलियो विस्तार हो । 
 

काइसिन/मार्किट म्यानुफ्याक्चरिङ पर्चेजिङ म्यानेजर्स इन्डेक्सले देशको उत्पादन क्षेत्रको स्वतन्त्र विश्लेषण गर्ने गरकेो छ । त्यसमा सूचकांक ५१.२ बाट बढेर ५२.८ पुगेको पाइयो । ५० भन्दा माथिको अंकले वृद्धि नै देखाउँछ । 

सोमवार जारी गरिएको आँकडा रोयटर्सले सर्वेक्षण गरेका विश्लेषकहरूले भनेको भन्दा १.३ अंक बढी हो । 

चीनको राष्ट्रिय तथ्यांक विभागले अघिल्लो साता जारी गरेको आधिकारिक पीएमआईसँग यो निजी सर्वेक्षण आँकडा मिल्न आउँछ । एजेन्सीका अनुसार, सूचकांक जुन महिनामा ५०.९ बाट बढेर जुलाई महिनामा ५१.१ पुगेको थियो । 
 

काइसिन म्यानुफ्याक्चरिङ पीएमआईले साना तथा निजी कम्पनीहरूमा जोड दिने गरेको छ भने सरकारी तथ्यांक विभागले ठूला र राज्यसँग जोडिएका उद्योगको प्रदर्शनलाई हेर्ने गरेको छ । 
 

काइसिन इन्साइट ग्रूपका अर्थशास्त्रीहरूले यी परिणामले आर्थिक पुनरुत्थानलाई प्रतिबिम्बित गर्ने बताए । क्षेत्रीय स्तरमा कोरोनाभाइरस संक्रमण देखिए पनि यसले सुधारको ट्रेन्डमा असर नपरेको उनीहरूको भनाइ छ । 
‘

आपूर्ति र माग दुवै पक्षमा सुधार आएको छ र सान्दर्भिक इन्डिकेटरहरू बलियो बनिरहेका छन् । तर हामीले रोजगारी तथा विदेशमा मागमा रहेको कमजोरीलाई अझै पनि ध्यान दिनुपर्ने हुन्छ,’ काइसिन इन्साइट ग्रूपका वरिष्ठ अर्थशास्त्री वाङ झेले बताए । 
 

विश्लेषकहरूका अनुसार, कोरोनाभाइरस स्टिमुलस प्याकेजले चीनको आर्थिक पुनरुत्थानमा सहयोग गरेको हो । देशको कुल गार्हस्थ्य उत्पादन दोस्रो त्रैमासिकमा ३.२ प्रतिशतले बढेको छ ।