चीन र पाकिस्तान मिलेर आर्थिक कोरिडोरमा हजारौं करोड रुपैयाँ पर्ने रेल परियोजना शुरू गरिरहेका छन् । विवादित क्षेत्र हुँदै रेलमार्ग जाने भएको भन्दै भारतले यसमा आपत्ति उठाइरहेको छ । 

साउथ चाइना मर्निङ पोस्टमा प्रकाशित खबरअनुसार, चीन र पाकिस्तान मिलेर ६.८ अर्ब डलर बराबरको रेलवे प्रोजेक्ट शुरू गर्न लागेका हुन् । 

त्यसबाहेक बेइजिङ र इस्लामाबाद मिलेर थाकोटदेखि हवेलियाँसम्म ११८ किलोमिटर लामो सडक पनि बनाएका छन् । पाकिस्तानको इस्लामाबाददेखि चीनको सिनजियाङ क्षेत्रमा रहेको काशगरसम्म पुग्ने सडकको एक अंगका रूपमा त्यो सडक रहेको छ । 

नयाँ सडक जम्मु–कश्मीरको विवादित क्षेत्रछेउबाट निस्कनेछ । सडक निर्माण सम्पन्न भएपछि चीन र पाकिस्तान दुवैलाई जम्मु–कश्मीरका अनेकौं क्षेत्रमा नजर राख्न सहज हुनेछ । 
 

इस्लामाबाददेखि काशगरसम्म पुग्ने राजमार्गको नाम फ्रेन्डशिप हाइवे हो । भारतका रणनीतिक भागमा नजर राख्न अनि पारस्परिक परिवहनको बाटो खोल्न पनि यसले सहयोग पुग्नेछ । 
 

शांघाई म्युनिसिपल सेन्टर फर इन्टरनेसनल स्टडीजका विज्ञ वाङ देहुआले बताएअनुसार, पाकिस्तान र चीनको यस परिवहन परियोजनाले भारतलाई अलिकति तनाव दिएकै छ । 

सडकबाट भारतका रणनीतिक क्षेत्रमा सजिलै तारो लगाउन सकिने भएकाले भारत चिन्तित बनेको हो । 
 

कश्मीर पहिले तीन देशको विषय नभई भारत र पाकिस्तानको मात्र विषय थियो । तर भारतले जम्मु–कश्मीरलाई केन्द्रशासित प्रदेश बनाएर अक्साई चीनमा समेत दाबी गरेपछि चीनले चिन्ता व्यक्त गर्दै कश्मीरलाई त्रिपक्षीय विषय मानेर कुराकानी गर्न भारतलाई आग्रह गरेको थियो तर भारतले टेरेन । 

भारतले अटेरी गरेपछि चीनले पेटी सडक पहलअन्तर्गतको चीन पाकिस्तान आर्थिक कोरिडोरलाई अघि बढाएको हो ।