पछिल्लो २४ घण्टामा राजधानी काठमाडौं उपत्यकामा १२७ जना कोरोना संक्रमित थपिएका छन् ।

संक्रमितको राष्ट्रिय विवरण सार्वजनिक गर्दै स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले काठमाडौंमा १११, ललितपुरमा ११ र भक्तपुरमा ५ जना संक्रमित थपिएका विवरण सार्वजनिक गरे ।

काठमाडौंका संक्रमितमध्ये १ जनाको हेटौडा प्रयोगशालामा संक्रमण पुष्टि भए पनि संक्रमित हाल कहाँ छन् भनेर खुलाइएको छैन । अन्य सबै संक्रमण राजधानीकै विभिन्न प्रयोगशालामा पुष्टि भएको हो ।

अद्यावधिक विवरण अनुसार पछिल्लो २४ घण्टामा देशभर थप ५२५ जनामा कोरोना संक्रमण पुष्टि भएको छ । प्रवक्ता गौतमले देशभरका ३८ प्रयोगशालामा भएको परीक्षणबाट ५२५ जनामा संक्रमण पुष्टि भएको जानकारी दिए ।

हालसम्म देशभर कूल संक्रमितको संख्या २४ हजार ९५७ पुगेको प्रवक्ता गौतमले बताए । यससँगै देशभर सक्रिय संक्रमित ८ हजार २५ जना रहेका छन् भने १६ हजार ८३७ जना डिस्चार्ज भइरहेका जनाइएको छ । पछिल्लो २४ घण्टामा १०९ जना डिस्चार्ज भएका छन् ।

देशभरका क्वारेन्टीनमा १४ हजार ७६९ जना रहेका प्रवक्ता गौतमले जानकारी दिए । ५०० भन्दा बढी सक्रिय संक्रमित रहेका जिल्लामा पर्सा, रौतहट, महोत्तरी र काठमाडौं रहेका छन् भने संक्रमित शून्य रहेका जिल्ला संखुवासभा, मनाङ, मुस्ताङ, डोल्पा र हुम्ला रहेका छन् ।

देशभर कोरोना भाइरस संक्रमणबाट मृत्यु हुने कूल संक्रमितको संख्या ९५ पुगेको छ । मन्त्रालयका प्रवक्ता प्रा.डा. जागेश्वर गौतमले मृतकमध्ये ७३ पुरुष र २२ महिला रहेका जानकारी दिए । पछिल्लो पटक ४ जनाको मृत्यु भएको हो ।

महोत्तरीको मटिहानीका ४५ वर्षीय पुरुषको रामजानकी अस्पतालमा मृत्यु भएको प्रवक्ता गौतमले जानकारी दिए । उनका अनुसार धनुषाको मिथिलाका ८५ वर्षीय महिलाको बीपी कोइराला स्वास्थ्य विज्ञान प्रतिष्ठान धरानमा, अछामको रामारोशनमा १८ वर्षीय पुरुषको पाटन स्वास्थ्य विज्ञान प्रतिष्ठान ललितपुरमा र मोरङको विराटनगरका ५७ वर्षीय पुरुषको कोशी अस्पताल विराटनगरमा निधन भएको छ ।

मृतकमध्ये प्रदेश १ का ८ जना, प्रदेश २ का ३९ जना, बाग्मतीका १८, गण्डकीका ६, प्रदेश ५ का १२, कर्णाली ४ र सुदूरपश्चिमका ८ जना रहेका छन् ।