रुसी सेनासँग झडप भएपछि अमेरिकाले सिरियामा सैन्य उपस्थिति बढाएको छ । 

६ वटा ब्राड्ली लडाकू वाहन र १०० जना सैनिक सिरियाको उत्तरपूर्वी सीमामा तैनाथी गरिएको अमेरिकाले जनाएको छ । 

अमेरिका र रुसका सैन्य गश्तीहरूबीच यसै वर्ष मात्र अनेकौं झडप भएका छन् । 

अमेरिकी जलसेनाका क्याप्टेन बिल अर्बनका अनुसार, सैनिक संख्या बढाउने निर्णयले गठबन्धन फौजको सुरक्षा सुनिश्चित गर्नेछ । 

लडाकू वाहनबाहेक अमेरिकाले सेन्टिनेल राडार पनि राखेको र अमेरिकी लडाकू विमानको गश्ती पनि बढाएको उनले बताए । 
 

अर्बनले शुक्रवार भने, ‘अमेरिका सिरियामा कुनै पनि सेनासँग झडप गर्न चाहँदैन । तर आवश्यक परेमा उसले गठबन्धन सेनालाई प्रतिरक्षा गर्नेछ ।’
 

अर्बनले बयानमा रुसी सेनाको नाम लिएनन् । 

अमेरिकाले यी वाहन तथा सेना रुसलाई एक सुरक्षा क्षेत्रभित्र पस्नबाट रोक्नका लागि पठाएको थियो । 

यी दुई देशबीच विगत केही वर्षयता विवाद चलिरहेको छ । तर केही हप्तायता चाहिँ उत्तरपूर्वी सिरियामा दुई देशको तनाव बढिरहेको छ । 

अगस्ट महिनाको अन्त्यमा रुसको एक वाहनसँग ठोकिएर सातजना अमेरिकी सैनिकहरू घाइते भएका थिए । रुस र अमेरिकाका सरकारहरूले घटनाका लागि एक अर्कालाई जिम्मेवार ठहर्‍याए । 

अमेरिकाका अनुसार, रुसी सैनिकहरू एक सुरक्षा क्षेत्रमा प्रवेश गरेका थिए जबकि उनीहरूले त्यहाँ नजानका लागि पहिले नै सहमति गरेका थिए । तर उक्त क्षेत्रमा गश्ती गर्नका लागि आफूहरूले अमेरिकालाई पहिले नै जानकारी दिइसकेको रुसको भनाइ छ । 

उक्त क्षेत्रमा अमेरिकाका ५०० सैनिक छन् । पहिलाको भन्दा यो संख्या निकै कम हो । आतंकवादी संगठन आईएसबाट हुने खतरालाई निस्तेज पार्न यो तैनाथी गरिएको हो ।

रुसले सिरिया सरकारलाई साथ दिएको छ भने अमेरिकाले कुर्दिश लडाकूहरूलाई साथ दिइरहेको छ ।