सत्तारुढ नेपाल कम्युनिस्ट पार्टी (नेकपा) आवद्ध रुपन्देहीका करीब २ हजार ३०० व्यवसायीले नेकपाको पार्टी सदस्यबाट राजीनामा दिने भएका छन् ।

प्रदेश राजधानी दाङ कायम गर्ने प्रस्ताव नेकपा सरकारले ल्याएको र ह्वीप जारी गरेको विरोधमा राजीनामा दिने तयारीमा रहेका व्यवसायीहरू पार्टीको केन्द्रीय विभागका सदस्य समेत छन् । 

सरकारले बुटवलमा रहेको राजधानीलाई अन्यत्र सार्ने निर्णय गरेकाले नेकपामा रहिरहन नसक्ने नेकपा समर्थित व्यवसायीले जनाएका छन् ।

‘पार्टीले निरंकुश तरिका अपनाएर राजधानी सार्ने निर्देशन गर्‍यो । हाम्रा माननीयहरूलाई मत राख्न समेत वञ्चित गरियो । यसरी निरंकुशता स्वीकार गरेर पार्टीमा बस्नुको कुनै औचित्य नभएकाले राजीनामा दिने निर्णय गरेका हौं,’ बुटवलमा आयोजित पत्रकार सम्मेलनमा रुपन्देही उद्योग संघका अध्यक्ष बावुराम बोहोराले भने ।

रुपन्देहीबाट निर्वाचित सांसद तथा मन्त्रीलाई रुपन्देहीका संघसंस्थाले बहिष्कार गर्ने निर्णय समेत गरेका छन् । ‘अब हामी प्रदेशका सांसद तथा मन्त्रीहरूले बोलाएका कार्यक्रममा पनि जान्नौं, उहाँहरूलाई पनि निमन्त्रणा गर्दैनौं,’ नेपाल उद्योग परिसंघका प्रदेश संयोजक एजाज आलमले भने ।

उद्योग–व्यवसाय सम्बद्ध नेकपा पार्टी सदस्य रहेका संघसंस्थाका अध्यक्षद्वारा आयोजित पत्रकार सम्मेलनमा रुपन्देहीका जननिर्वाचित प्रतिनिधिले रुपन्देहीबासीलाई धोका दिएकाले उनीहरूले गरेका कुनै पनि कार्यक्रममा सहभागिता नजनाउने तथा अतिथि बनाएर कार्यक्रम नगर्ने घोषणा गरेका छन् । 

‘उहाँहरूले हामीलाई धोका दिनुभयो, मतदाताको मानमर्दन गर्नुभयो । त्यति मात्र होइन, रुपन्देहीका संघसंस्थाले प्रदेश सरकारको स्थायित्वका लागि भौतिक संरचना उपलब्ध गरेको सहयोगको अवमूल्यन गर्नुभयो । त्यसैले उहाँहरूलाई सम्मान दिएर कार्यक्रममा निम्त्याउनुको कुनै औचित्य रहेन,’ रुपन्देही व्यापार संघका पूर्व अध्यक्ष मोतिलाल पाण्डेले भने ।