महासंघमा चुनावी सरगर्मी

तस्वीर सौजन्य : कान्तिपुर दैनिक

नेपाल उद्योग वाणिज्य महासंघले निर्वाचन तालिका सार्वजनिक गरेको छ ।

महासंघको ५४औं वार्षिक साधारणसभा तथा कार्यकारिणी समितिको निर्वाचन मंसिरमा गरिँदै छ । आगामी मंसिर ११ र १२ मा वार्षिक साधारणसभा अनि १३ गते निर्वाचन गरिने महासंघका मुख्य निर्वाचन अधिकृत उपेन्द्रकेशरी न्यौपानेले जानकारी दिए । गत चैतमा हुनुपर्ने महासंघको साधारणसभा तथा निर्वाचन कोभिड–१९ का कारण पटकपटक स्थगन भएको थियो ।


Advertisement

मंसिर ४ को साँझ ५ बजेसम्म उम्मेदवारको मनोनयनपत्र दाखिला गर्न पाइनेछ । मतदान गर्न पाउने सदस्यको पहिलो नामावली मंसिर २ गते प्रकाशित गरिने महासंघले बताएको छ । मतदान गर्न पाउने सदस्यहरूको नामावलीमाथि दाबी विरोध गर्ने समय मंसिर ३ को बिहान ११ देखि साँझ ५ बजेसम्म कायम गरिएको छ ।

कोभिड–१९ को परिस्थितिलाई दृष्टिगत गरी उम्मेदवारको मनोनयनलगायत प्रतिनिधिपत्र दर्ता इमेलमार्फत गर्ने कामलाई प्राथमिकता दिइएको महासंघले बुधबार प्रकाशन गरेको सूचनामा उल्लेख छ । इमेलबाट पठाइएका सबै कागजातको सक्कल मंसिर ४ को साँझ ५ बजेभित्र महासंघको सचिवालयमा आइपुग्नुपर्ने र अन्यथा मनोनयन बदर हुनेछ । उम्मेदवारको पहिलो नामावली मंसिर ४ को साँझ ६ बजे प्रकाशन गरिने न्यौपानेले जानकारी दिए ।


Advertisement

उम्मेदवारी मनोनयनपत्र माथिको दाबी विरोध गर्ने समय मंसिर ५ को बिहान साढे ११ देखि दिउँसो २ बजेसम्म रहने उनको भनाइ छ । उम्मेदवारले मनोनयन फिर्ता लिने समय मंसिर ६ को बिहान ११ देखि मंसिर ८ गते दिउँसो ३ बजेसम्म रहनेछ । उम्मेदवारको अन्तिम नामावली मंसिर ८ गते साँझ ५ बजे प्रकाशन गरिनेछ । साथै निर्वाचन १३ गते बिहान ८ देखि दिउँसो ४ बजेसम्म हुनेछ । मतदान गर्दा एक पटकमा २५ जनाभन्दा बढी व्यक्ति जम्मा नहुने गरी भौतिक दूरी कायम गरिने न्यौपानेले बताए ।

स्वास्थ्य सुरक्षाको मापदण्ड पूरा गरी निर्वाचन गराइनेछ । राष्ट्रिय प्रज्ञा प्रतिष्ठान, कमलादी, कार्की ब्यांक्वेट, बबरमहल र महासंघ कार्यालय टेकुमा छुट्टाछुट्टै रूपमा निर्वाचन हुनेछ । गृह मन्त्रालयको स्वीकृति एवं स्वास्थ्य मन्त्रालयको मापदण्ड पूरा गरी निर्वाचन कार्यक्रम सञ्चालन गरिने सूचनामा जनाइएको छ ।

यसैबीच महासंघको वरिष्ठ उपाध्यक्षमा वर्तमान उपाध्यक्ष चन्द्रप्रसाद ढकालले उम्मेदवारी दर्ता गराएका छन् । महासंघको केन्द्रीय कार्यालय टेकुमा बुधबार उनको प्यानलका सबै उपाध्यक्ष पदका उम्मेदवारले उम्मेदवारी दर्ता गराएका हुन् । ढकाल प्यानलबाट वस्तुगत उपाध्यक्षमा उमेशलाल श्रेष्ठ, जिल्ला नगर उपाध्यक्षमा गुणनिधि तिवारी र एसोसिएट उपाध्यक्षमा रामचन्द्र संघईले उम्मेदवारी दर्ता गराएका हुन् ।

गत वर्ष मंसिरमा ढकालको गृहजिल्ला बागलुङमा बागलुङ उद्योग वाणिज्य संघले ढकाललाई महासंघको वरिष्ठ उपाध्यक्षमा उम्मेदवार प्रस्ताव गरेको थियो । पछि फागुनमा काठमाडौंमा औपचारिक कार्यक्रममार्फत ढकालले आफ्नो उम्मेदवारी घोषणा गरेका थिए । त्यस्तै असारमा ढकालसहित सबै उपाध्यक्षले सामूहिक उम्मेदवारी घोषणा गरेका थिए । उम्मेदवारी दर्तापछि ढकालले कोभिड–१९ र अन्य विभिन्न कारणबाट उत्पन्न व्यावसायिक समस्या समाधान र मुलुकको आर्थिक समृद्धिमा सशक्त निजी क्षेत्रको खाँचो रहेकाले आफूले उम्मेदवारी दिएको प्रतिक्रिया दिए । अहिलेको जटिल परिस्थितिमा महासंघमा सशक्त र डाइनामिक नेतृत्वको आवश्यकता रहेको उनको भनाइ छ ।

आफ्नो समूह मात्र अहिलेको समय र परिस्थितिअनुकूलको नेतृत्व भएको उनको दाबी छ । ‘देश कोभिड–१९ को महामारीको चपेटामा छ । अर्थतन्त्रका सबैजसो अवयव क्षतविक्षत भएका छन् । व्यवसाय र व्यवसायी दुवै संकटमा छन्,’ उनले भने, ‘यस्तो जटिल परिस्थितिमा व्यवसाय र व्यवसायीलाई जोगाउन सकिएन भने यसले मुलुकको अर्थतन्त्र र विकासमा समेत दीर्घकालीन प्रभाव पर्छ ।’ व्यवसाय र व्यवसायीलाई बचाउन, अहिलेको समस्याबाट मुलुकको समग्र अर्थतन्त्रलाई बचाउन, मुलुकको विकास र समृद्धिमा सरकारसँग हातेमालो गर्न र निजी क्षेत्रको विकासमा रचनात्मक भूमिका निर्वाह गर्न आफूहरूले उम्मेदवारी दिएको उनको भनाइ छ । कान्तिपुर दैनिकमा खबर छ ।

छापाबाट
छापाबाट

लेखकबाट थप...

कमेन्ट गर्नुहोस्