नेपाल कम्युनिस्ट पार्टी (नेकपा)का कार्यकारी अध्यक्ष पुष्पकमल दाहाल प्रचण्डले अर्का अध्यक्ष एवं प्रधानमन्त्री केपी शर्मा ओलीसँग हिजो भएको भेटबारे आफूपक्षीय नेताहरूलाई सविस्तार जानकारी गराएका छन् ।

आफूसँगको भेटमा ओलीले सहमतिबेगर बैठक बोलाए त्यो पार्टी फूटको बिन्दु हुनेछ भनेर चेतावनी दिएको प्रवक्ता नारायणकाजी श्रेष्ठ प्रकाशले जानकारी गराए ।  

‘स्थायी कमिटीले गरेका निर्णय कार्यान्वयन र सरकारलाई पार्टीको मार्गदर्शनका आधारमा सञ्चालन गर्नका लागि बैठक बसौं भनेर बारम्बार प्रस्ताव राखियो, अर्का अध्यक्ष केपी ओलीले बैठक बस्न सहमति दिनुभएन,’ धुम्बाराही भेलाबारे प्रवक्ता श्रेष्ठले भने, ‘सहमति नदिएको अवस्थामा, कार्यकारीले एक्लै औपचारिक बैठक बोलाएर बसेमा त्यो फूटको बिन्दु हुनेछ भनेर भन्नुभएको कुरा जानकारी गराउनु भयो ।’ 

कार्यकारी अध्यक्षलाई बैठक बोलाउने अधिकार भएपनि पार्टी एकता जोगाउन ओलीसँगको सहमतिमै प्रचण्डले आज सचिवालयको अनौपचारिक बैठक बोलाएको श्रेष्ठले दाबी गरे । 

शुक्रवारको भेलामा अध्यक्ष प्रचण्ड, वरिष्ठ नेता माधवकुमार नेपाल, वरिष्ठ नेता झलनाथ खनाल, उपाध्यक्ष वामदेव गौतम र प्रवक्ता नारायणकाजी श्रेष्ठ पनि उपस्थित थिए । 

‘कार्यकारी अध्यक्षले औपचारिक बैठक बोलाउन सक्ने भएपनि पार्टी एकतालाई जोगाएर लैजान अनौपचारिक बैठक राख्नुभयो । हामी ५ जनाले भोलि अर्का अध्यक्ष ओलीलाई सहमतिका आधारमा बैठक राख्नका लागि आग्रह गर्ने सहमति गरेका छौं,’ श्रेष्ठले भने । 

स्थायी कमिटी बैठकका निर्णय कार्यान्वयन नगर्दा पार्टीमा समस्या आएको आफूहरूको निष्कर्ष रहेको श्रेष्ठले बताए । 

‘स्थायी कमिटी बैठकका निर्णय कार्यान्यनमा भएको अड्चनका कारण समस्या आएकाले हामीले दुई अध्यक्षलाई बैठक बोलाउन माग गर्‍यौं, प्रचण्डले पनि बैठक बोलाउनका लागि ओलीसँग सहमतिका लागि बारम्बार पहल गर्नुभयो,’ श्रेष्ठले भने, ‘अहिलेको परिस्थितिमा पार्टीमा जुनसुकै प्रकारको समस्या, गत्यावरोधको स्थिति देखापरेको भएपनि सहमतिका आधारमा बैठक बस्ने र पार्टी एकतालाई बचाउँदै विधि र पद्धतिका आधारमा लैजान अविलम्ब बैठक बोलाउनुपर्छ भन्ने हाम्रो माग छ,’ श्रेष्ठले भने । 

भेलामा सहभागी अधिकांशले स्थायी कमिटी बैठकका निर्णय कार्यान्वयन नगर्दा समस्या आएको भन्दै ओलीलाई भेटेरै बैठक राख्न आग्रह गर्ने सुझाव प्रचण्डलाई दिएका थिए ।

प्रचण्डले ओलीसँग समय मिलाएर शनिवार ५ जनाले ओलीलाई भेट्ने निर्णय भएको अर्का एक सदस्यले बताए ।

स्रोतका अनुसार बैठकमा प्रचण्डले आफू एक्लैले बैठक बोलाउन गरेको प्रयास सफल नभएको भन्दै बैठक बोलाउनका लागि सामूहिक रूपमा जान प्रस्ताव गरेका थिए ।