कोरोना महामारीका बीच निजी क्षेत्रको सर्वोच्च संस्था नेपाल उद्योग वाणिज्य महासंघको ५४ औं महाधिवेशन बिहीवारदेखि शुरू हुँदैछ । यस महाधिवेशनले महासंघलाई नयाँ नेतृत्व दिने छ । 

महासंघका वरिष्ठ उपाध्यक्ष शेखर गोल्छा यस महाधिवेशनपश्चात विधानतः अध्यक्ष बन्नेछन् ।

कोरोना महाव्याधीले थलिएको अर्थतन्त्रलाई माथि उठाउनका लागि पनि यस निर्वाचनले अग्रणी भूमिका खेल्ने महासंघका पदाधिकारीहरू बताउँदै आएका छन् । 

महासंघको निर्वाचनमा वरिष्ठ उपाध्यक्ष पदका लागि २ समूह प्यानल नै बनाएर अगाडि बढेका छन् । 

कोरोना भाइरसका कारण करिब ७ महिना पर धकेलिएको महासंघको चुनावमा यतिखेर सबैको ध्यान खिचिएको छ । 

भर्चुअल रूपमा हुने साधारण सभाको उद्घाटन प्रधानमन्त्री केपी शर्मा ओलीले प्रधानमन्त्री निवास बालुवाटारबाटै गर्ने कार्यक्रम रहेको छ ।

महासंघको सचिवालयका अनुसार, बन्द सत्रको कार्यक्रम शुक्रबार पनि अभौतिक रूपमै हुनेछ । बन्दसत्रमा महासङ्घको आर्थिकलगायत विभिन्न प्रतिवेदन पेस गर्ने र पास गर्ने कार्यक्रमसहित निर्वाचनमा वरिष्ठ उपाध्यक्षका उम्मेदवारहरूले नीतिगत मन्तव्यसमेत राख्ने छन ।

निर्वाचनको कार्यक्रम भने शनिबार तीन स्थानमा राखिएको छ । 

सचिवालयका अनुसार नेपाल प्रज्ञा प्रतिष्ठानमा जिल्ला नगर समूहको मतदान हुनेछ भने बबरमहलस्थित कार्की ब्याङ्क्वेटमा एसोसिएट समूहको मतदान केन्द्र राखिएको छ । वस्तुगततर्फको मतदान भने टेकुस्थित महासङ्घ सचिवालय परिसरमै गर्ने निर्धारण गरिएको छ ।

अन्तिम समयसम्ममा पनि भएन सहमति 
महासंघको निर्वाचनमा सकेसम्म सहमतिमा नेतृत्व चुन्ने अभ्यास भएको थियो । कोरोना महामारीलाई मध्यनजर गर्दै सहमतिमा नेतृत्व चयन गर्नुपर्नेमा महासंघका पूर्वअध्यक्षहरूले जोड दिएका थिए । पूर्व अध्यक्षहरूमध्येबाट रविभक्त श्रेष्ठले २ पक्षलाई नै सहमतिका लागि जोड दिँदै  आएका थिए । यद्यपी अन्तिम समयसम्ममा पनि सहमति भने जुट्न सकेन । ‘दुवै पक्षले एकले अर्कोलाई कमजोर देखे, त्यसकारण सहमति हुन सकेन,’महासंघका एक पदाधिकारले लोकान्तरसँग भने । 

कोको छन् उम्मेदवार ? 
महासंघको निर्वाचनका लागि चन्द्र ढकाल र किशोर प्रधानबीच भिडन्त । 

ढकालको प्यानलमा उद्योग वाणिज्य संघ समूहको उपाध्यक्षका लागि गुणनिधि तिवारी, वस्तुगत संघ समूहबाट उपाध्यक्षका लागि उमेशलाल श्रेष्ठ र एसोसिएट सदस्य समूहको उपाध्यक्षका लागि रामचन्द्र संघईले उम्मेदवारी घोषणा गरेका छन । 

यस्तै प्रधानको प्यानलबाट जिल्ला नगरतर्फ उपाध्यक्षमा दिनेश श्रेष्ठ, वस्तुगततर्फ उपाध्यक्षमा अञ्जन श्रेष्ठ र एसोसिएटतर्फ उपाध्यक्षमा सौरभ ज्योतिले प्रतिस्पर्धा गर्दैछन् । 

महासंघमा जिल्ला र नगरको ५० प्रतिशत, एसोसिएटको ३० प्रतिशत र वस्तुगतको २० प्रतिशत भोटिङ अधिकार हुन्छ ।

जिल्ला र नगरमा एक उपाध्यक्षसहित २६ जना, एसोसिएटमा एक उपाध्यक्षसहित १८ जना, वस्तुगतमा एक उपाध्यक्षसहित १४ जना निर्वाचित हुनेछन् । यस्तै महासंघमा जिल्ला र नगरमा १ सय ६, वस्तुगतमा १०१ र एसोसिएटमा ८ सय जना मतदाता छन् ।