ओली नआएपछि सचिवालय बैठक सर्‍यो, मंसिर २० गते अनिवार्य उपस्थित हुन आग्रह

प्रधानमन्त्री एवं नेकपा अध्यक्ष केपी शर्मा ओली बैठकमा उपस्थित नभएपछि बुधवारका लागि तय भएको नेकपा सचिवालय बैठक औपचारिकतामा प्रवेश नगरी स्थगित भएको छ ।

ओलीको उपस्थिति विना नै सचिवालय बैठक केहीबेर बसेको थियो । 


Advertisement

पार्टीमा देखापरेका संकट समाधानको लागि अध्यक्ष ओलीको समेत उपस्थितिमा बैठक बस्नुपर्ने भएकाले मंसिर २० गतेसम्मको लागि सचिवालय बैठक स्थगित भएको प्रवक्ता नारायणकाजी श्रेष्ठले जानकारी दिए । 

‘आज बसेको सचिवालय बैठकमा अध्यक्ष कमरेड केपी ओली उपस्थित हुनुभएन । त्यसकारण आजको बैठकले पार्टीमा देखापरेको संकट समाधानको लागि ओली समेतको उपस्थितिमा छलफल गर्नु आवश्यक, उपयुक्त र उचित हुन्छ भन्ने निष्कर्षका साथ आगामी बैठकमा अनिवार्य उपस्थितिको अपेक्षासहित बैठकमा आउन अनुरोध गर्ने निर्णय भयो,’ श्रेष्ठले भने, ‘सचिवालयको अर्को बैठक २० गते १ बजे बस्नेछ ।’


Advertisement

मंसिर २० गतेको बैठकमा पनि ओली नआए के हुन्छ भन्ने पत्रकारको जिज्ञासामा प्रवक्ता श्रेष्ठले कुनै जवाफ दिएनन् । मंगलवार शुरू भएको सचिवालय बैठकमा दुवै अध्यक्षका प्रतिवेदनमाथि छलफल प्रारम्भ भएको थियो । 

प्रधानमन्त्री निवास बालुवाटारमा दिउँसो २ बजे बस्ने भनिएको बैठकका लागि कार्यकारी अध्यक्ष पुष्पकमल दाहाल ‘प्रचण्ड’ लगायत सचिवालयका सबै नेताहरू बालुवाटार पुगेका थिए । 

सचिवालय प्रभावित भएपछि बिहीवारका लागि तय भएको स्थायी कमिटी बैठक मंसिर २१ गते बस्ने गरी तय भएको प्रवक्ता श्रेष्ठले बताए । मंसिर २५ गते बस्ने भनिएको केन्द्रीय कमिटी बैठकबारे भने बिहीवार कुनै निर्णय भएन । 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्