पछिल्लो समय महिला हिंसाका घटना विश्वभरी नै बढीरहेका छन् । कुनै पनि स्थानमा महिलाले एक्लै सुरक्षाको महशुस गर्ने अवस्था छैन । त्यसैले सुरक्षाका लागि विभिन्न कम्पनीले नयाँ नयाँ वस्तु उत्पादनमा पनि जोड दिँदै आएका छन् । भारतमा एक यस्तै हतियार बनाइएको छ । जसले आपतमा पर्दा महिलाको सुरक्षा मात्रै होइन, आफन्त र प्रहरीलाई खबर गर्न पनि मद्दत गर्नेछ । 

महिलासँग अनावश्यक जिस्किने तथा हिंसात्मक गतिविधि गर्ने घटनालाई मध्यनजर गर्दै भारतको वारणासीको अशोका इन्स्टिट्यट अफ कम्प्युटर साइन्सका २ छात्राले एक स्मार्ट चक्कु बनाएका छन् । यो चक्कु केवल समयमा तपाइँको सुरक्षा मात्र गर्ने होइन, आफन्तलाई फोन गरेर सचेत हुन पनि मद्दत गर्दछ । 

यस्तो चक्कु शालिनी र दीक्षा नामका दुई छात्राले बनाएका हुन् । उनीहरूले यो चक्कु सामान्य चक्कुजस्तो नभएको बताएका छन् । यसमा एक सिमकार्ड प्रयोग हुन्छ । जसले आपतमा रहेकी महिलालाई अपराधीबाट आत्मरक्षा गर्न सहयोग गर्नेछ ।

जब आपत पर्दा महिलाले चक्कु निकाल्छिन्, यहाँ फिट गरिएको तीन नम्बरमा लोकेसनका साथै फोन जाने गर्दछ । यो डिभाइस रेडियो फ्रिक्वेन्सीमार्फत मोबाइलमा सम्पर्क गर्नेछ । चक्कुमा लगाइको बटनमार्फत मोबाइलमा फोन जान्छ र महिला रहेको लोकेसन पनि मोबाइलमा जाने गर्दछ ।

प्रहरी र आफन्त आउँदासम्म महिलाले चक्कुको सहायताले आफ्नो आत्मरक्षा गर्नसक्ने उनीहरूले बताएका छन् । स्टीलबाट बनेको यो चक्कुको तौल करिब ६० ग्राम रहेको बताइएको छ । यो बनाउन करिब २ महिनाको समय लागेको थियो र यसमा १५०० रुपैयाँ खर्च लोको बताइएको छ ।

छात्राले आफ्नो विभागका प्रमुख श्याम चौरसियाको निर्देशनमा स्मार्ट चक्कु बनाएका हुन् । उनीहरूले महिलाको सुरक्षासँग जोडिएका वस्तु निर्माणमा अहिले आफूहरू लागिपरेको बताएका छन् । चक्कु आत्मरक्षाका लागि खास हतियार भएको उनीहरूको दाबी छ । 

इन्स्टिट्युटका इन्चार्ज चौरसियाले स्मार्ट चक्कुको माध्यमबाट अपराधीलाई तर्साउन मात्र नभइ आसपासमा रहेका मानिसहरूलाई प्रहरी बोलाउन आकर्षित गर्ने पनि बताएका छन् ।

उनले भनेका छन्, यसमा ठूलो आकारको ज्वेलरीभित्र चक्कु फिट गरिएको छ । जसले मानिसको ध्यान आकर्षित गर्नेछ । महिलाको सुरक्षाका लागि ब्लुटुथमा जोडिएको छ । जसले लोकेसनका साथ आपतमा फसेका महिलाको रक्षा गर्न मद्दत गर्नेछ ।’