नेपाली कांग्रेसका वरिष्ठ नेता रामचन्द्र पौडेलले तनहुँमा हिजो आफूमाथि भएको आक्रमणले गणतन्त्र नै लज्जित भएको आरोप लगाएका छन् ।

उनले कम्युनिस्टहरूले समस्या जन्माउन जानेपनि समाधान गर्न असफल भएका आरोप लगाए । 

तनहुँको बुल्दिखोला पुलको बिहीवार उद्घाटन गर्दै नेता पौडेलले कम्युनिस्ट सरकारका कारण गणतन्त्र लज्जित हुने अवस्था आएको बताएका हुन् । ‘हिजोको क्रियाकलापले गणतन्त्र नै लज्जित भएको छ, संविधान लज्जित भएको छ र नेपालको सभ्यता लज्जित भएको छ । यिनीहरूको हातबाट परिवर्तनको रक्षा हुन्छ ?’ पौडेलले प्रश्न गरे । 

पौडेलले कम्युनिस्टको हातमा लोकतन्त्र सुरक्षित नभएको आरोप लगाए । उनले हिजो तनहुँमा लगाएको निषेधाज्ञा लोकतन्त्र र मौलिक प्रश्न उठाएको दावी गरे । ‘पाडो खानेले बाच्छो राख्दैन, हिजोको निषेधाज्ञाले लोकतन्त्र सुरक्षित राख्दैन,’ उनले भने ।

हिजो सोही पुल उद्घाटनाका क्रममा तनाव भएपछि नेता पौडेललाई प्रहरीले नियन्त्रणमा लिएको थियो । कडा सुरक्षाबीच बिहीवार पौडेलले पुल उद्घाटन गरेका छन् ।