संविधानमा प्रतिनिधि सभा विघटनको धारा नदेखेको भन्दै नेपाली कांग्रेसका सांसद रमेशजंग रायमाझीले संविधानको प्रति प्रधानमन्त्री केपी शर्मा ओलीलाई पठाएका छन् ।

बिहीवार राष्ट्रिय सभा बैठकको विशेष समयमा बोल्दै सांसद रायमाझीले प्रधानमन्त्री ओलीले हिटलरको शैलीमा प्रतिनिधि सभा विघटन गरेको आरोप लगाएका हुन् । 

‘संविधान नेपालीमा लेखिएको छ, नेपालीमा पढ्न जान्नुभएन भने अंग्रेजीमा उल्था गरिएको छ, पढ्नु होला । म बोलेपछि अध्यक्षमार्फत प्रधानमन्त्रीलाई संविधानको यो प्रति पठाउने छु,’ रायमाझीले भने । 

वैकल्पिक सरकार नबनेमात्र मध्यावधिमा जान सकिने विकल्प भएपनि असंवैधानिक ढंगले संसद् भंग गरिएको भन्दै रायमाझीले भने– ‘तानशाह प्रधानमन्त्रीको भरमा हिँड्दा राष्ट्रपति विवादमा पर्नुभएको छ । जे पनि गर्ने प्रधानमन्त्री हिटलर हो ?’

रायमाझीले प्रतिनिधि सभा सदस्य नरहेका प्रधानमन्त्री ओलीले अदालतमा विचाराधीन विषयमा प्रतिनिधि सभा पुनःस्थापना हुँदैन भनेर प्रधानमन्त्रीले बोल्न नमिल्ने दाबी गरे । 

कांग्रेसकै अर्का सांसद प्रकाश पन्थले संविधानको धारा ७६ दोहोर्‍याएर पढ्न प्रधानमन्त्रीलाई सुझाव दिए ।