संयुक्त राष्ट्रसंघले म्यान्मारमा गरिएको सैन्य कूका विषयमा प्रतिक्रिया दिन खोजिरहेको बेलामा सुरक्षा परिषद्का दुई स्थायी सदस्य चीन र रुसले कूको भर्त्सना गर्ने बयानमा रोक लगाएका छन् ।

यी दुई ठूला शक्तिले म्यान्मारलाई प्रतिरक्षा गर्नमा लामो समयदेखिको राजनीतिक, आर्थिक र सैन्य सम्बन्ध जिम्मेवार छ । 

रुस र चीन म्यान्मारलाई हतियार उपलब्ध गराउने दुई प्रमुख राष्ट्र हुन् । त्यसैले उनीहरू राष्ट्रसंघको कुनै पनि किसिमको सैन्य वा आर्थिक प्रतिबन्धबाट म्यान्मारलाई प्रतिरक्षा गर्नेछन् ।
 

म्यान्मारले सन् २०१० देखि २०१९ सम्ममा दुई अर्ब ४० करोड डलरभन्दा बढीको हातहतियार खरिद गरेको स्टकहोम इन्टरनेसनल पीस रिसर्च इन्स्टिच्युटको आँकडाले देखाएको छ । 

चीनले १.३ अर्ब डलर बराबरको, रुसले ८० करोड ७० लाख बराबरको, भारतले १४ करोड ५० लाख बराबरको र दक्षिण कोरियाले नौ करोड डलर बराबरको हतियार म्यान्मारलाई उपलब्ध गराएका छन् । 

चीनले युद्धपोत, कम्ब्याट एयरक्राफ्ट, सशस्त्र ड्रोन, बख्तरबन्द गाडी र हवाई प्रतिरक्षा प्रणाली उपलब्ध गराएको छ भने रुसले लडाकू विमान र कम्ब्याट हेलिकप्टर बेचेको छ । 

भारतले म्यान्मारलाई सेकेन्ड ह्यान्ड पनडुब्बी उपलब्ध गराएको छ । त्यो म्यान्मारका लागि सबभन्दा ठूलो पनडुब्बी हो । 
 

सैन्यीकरणको कुरा गर्दा म्यान्मारले हालैका वर्षमा सशस्त्र बललाई आधुनिकीकरण गर्न शुरू गरेको छ । उसले कब्म्याट एयरक्राफ्ट लगायतका नयाँ हतियारहरू किनेको छ । 

उसले नयाँ युद्धपोत पनि किनिरहेको छ र आफैं पनि युद्धपोत बनाइरहेको छ । चीनले युद्धपोत निर्माणमा सहायता उपलब्ध गराइरहेको छ । त्यसमा आयातित हतियार, सेन्सर र इन्जिनहरू जडान गरिनेछ । 
 

म्यान्मारले थप सक्षम सशस्त्र बल बनाउन खोजिरहेको छ । त्यो सशस्त्र विद्रोही बलहरूविरुद्ध सक्षम बनिसकेको छ र अन्य राज्यविरुद्ध पनि बलियो बनेको छ । 

आफ्ना छिमेकीहरू चीन, भारत र थाइल्यान्डको तुलनामा म्यान्मारको सेनासँग कम हतियार तथा अत्याधुनिक हतियार प्रणाली पनि कम छ ।