प्रधानमन्त्री केपी शर्मा ओलीले २३ गते नारायणहिटी संग्रहालय अगाडिबाट दिएको चुनौतीको जवाफ प्रचण्डले बुधवार भृकुटीमण्डपबाट दिएका छन् ।

आजको विरोध सभामा ५ लाख उपस्थिति रहेको दाबी गर्दै प्रचण्डले भने– '​केपीजी देख्नुभयो सभा कस्तो हुन्छ ? देख्नुभयो विरोध प्रदर्शन कस्तो हुन्छ ?'

यसअघि ओली पक्षले नारायणहिटीअगाडि आयोजना गरेको जनसभालाई ओलीले इतिहासकै ठूलो आमसभा भनेर दाबी गरेका थिए ।

उक्त सभाले को सक्कली, को नक्कली भन्ने प्रश्नको जवाफ दिएको उनको जिकिर थियो ।

त्यसको जवाफमा प्रचण्डले आफूहरूको सभा अझै ठूलो भएको दाबी गरेका हुन् । 

उनले आवश्यक परे जनताले बालुवाटार र सिंहदरबार पनि घेर्ने बताए ।

'हेर्नुहोला केही दिनपछि सिंहदरबार घेर्न र बालुवाटार घेर्न लाखौंलाख जनता आउने छन् । जरुरी पर्‍यो भने सिंहदरबार र बालुवाटार घेर्ने अर्को आमसभा हामी आयोजना गर्नेछौं,' प्रचण्डले भने ।

उनले भाषणलाई बिट मार्ने क्रमममा '१० लाख जनता लिएर बालुवाटार घेर्न आउन नपरोस्' भनेर चेतावनी समेत दिए ।