साताको चौथो दिन बुधवार शेयर बजार ९.९४ अंकले वृद्धि भएको छ । नेप्से परिसूचक ०.३८ प्रतिशतले बढ्दा शेयर बजार २६११.४५ विन्दुमा पुगेको छ । 

यस दिन सेन्सेटिभ परिसूचक पनि १.४७ अंकले बढ्दै ४७५.०० विन्दुमा पुगेको छ ।

कारोबारको शुरूवाती समयदेखि नै नेपाल इन्फ्रास्ट्रक्चर बैंकको शेयर मूल्य सर्किट लेभलसम्म पुगेको थियो । उसले अन्तिमसम्ममा पनि सो लेभल कायम नै गरेको छ । 

इन्फ्रास्ट्रक्चर बैंकसँगै अन्य ३ कम्पनीको शेयर मूल्य पनि बुधवार उच्च वृद्धि भएको छ । अन्तिम समयमा इन्फ्रास्ट्रक्चर बैंकको शेयर मूल्य ९.९६ प्रतिशतले बढ्दै ४ सय ९७ रुपैयाँ कायम भएको छ ।

यस्तै कर्पोरेट डेभ्लपमेन्ट बैंकको ९.८९ प्रतिशतले वृद्धि भई शेयर मूल्य ७ सय २२ पुगेको छ । यस्तै हिमालय उर्जा विकास कम्पनी लिमिटेडको शेयर मूल्य ९.८३ प्रतिशतले बढेको छ भने समृद्धि फाइनान्सको ९.५० प्रतिशतले शेयरमूल्य बढेको छ । 

कुल २ सय ३ कम्पनीको १ करोड ७६ लाख ८८ हजार २ सय ७१ कित्ता शेयर ८ अर्ब ३ करोड ५५ लाख १० हजार ८ सय ४४ रुपैयाँमा खरिदबिक्री भएको छ । 

नेप्सेका अनुसार, यस दिन बैंकिङ, ट्रेडिङ, विकास बैंक, अन्य तथा मुचुअल फण्डको शेयर मूल्य बढेको छ । 

होटल, हाइड्रोपावर, फाइनान्स, निर्जीवन बीमा लगायतका उपसमूहमा राताम्मे भएको छ । 

इन्फ्रास्ट्रक्चर बैंकका लगानीकर्ताले सबैभन्दा बढी ९.९६ प्रतिशत नाफा कमाउदा सनराइज फ्रस्ट मुचुअल फण्डले सबैभन्दा धेरै ४.५३ प्रतिशतले गुमाएको छ ।