बोइङले ७७७ मोडलको विमान उपयोग नगर्न दियो निर्देशन

अमेरिकी विमान निर्माता कम्पनी बोइङले सबै एयरलाइन्स कम्पनीहरूलाई ७७७ मोडलका विमान उपयोग नगर्न चेतावनी दिएको छ । 

अघिल्लो साता अमेरिकाको डेनभरमा यस मोडलको विमानको इन्जिन फेल भएको थियो र घरहरूमा विमानका टुक्रा झरेका थिए । अमेरिकी नियामकले युनाइटेड एयरलाइन्सको विमानको परीक्षण गरेपछि कम्पनीले यो निर्देशन दिएको हो । 
 

---

Advertisement

---

बोइङकै अर्को ७४७–४०० मालवाहक विमानको पनि नेदरल्यान्ड्सको मास्त्रिख विमानस्थलबाट उडेलगत्तै टुक्राटाक्री खसेका थिए । 
 

लङटेल एभिएसनको उक्त विमानका टुक्राहरू मीरसेन शहरमा शनिवार खसेका थिए । एक महिला घाइते भएकी छन् र संरचनाहरूमा क्षति पनि पुगेको छ । 

---

Advertisement

---

युनाइटेड एयरलाइन्सले चाहिँ ७७७ मोडलका विमानलाइृ अस्थायी रूपमा सेवाबाट हटाएको जानकारी दिएको छ । 

बोइङ ७७७ विमानहरूको पंखालाई समय समयमा निरीक्षण गर्नुपर्ने आवश्यकता पनि यसले देखाएको छ । 

जापानी सञ्चारमाध्यम निक्केईका अनुसार, जापानले पनि यस मोडलको विमान उडानमा रोकको आदेश दिएको छ । यस विमानको इन्जिनमा समस्या देखिएको उसले डिसेम्बर महिनामा रिपोर्ट गरेको थियो । 
 

युनाइटेडमा यस मोडलका २५ विमान सञ्चालनमा छन् भने जापानका दुई एयरलाइन्स कम्पनीमा ३२ वटा यस मोडलका विमान छन् ।