नेपाल कम्युनिस्ट पार्टी (नेकपा) उपाध्यक्ष वामदेव गौतमले अध्यक्षद्वय प्रधानमन्त्री केपी शर्मा ओली र पुष्पकमल दाहाल ‘प्रचण्ड’लाई चारैतिरबाट घेराबन्दी गरेर पार्टी एकता गर्न सकिने बताएका छन् ।

कोरोना भाइरस (कोभिड–१९) विरुद्धको खोप लगाउन नयाँबानेश्वरस्थित सिभिल अस्पताल पुगेका उपाध्यक्ष गौतमले सञ्चारकर्मीसँग कुरा गर्दै ओली र प्रचण्ड विनाको एकतालाई कसैले नमान्ने बताए ।

ओली र प्रचण्ड दुवैतिरका दोस्रो पुस्ताका नेताहरूलाई एकजुट गराएर दबाब दिन सकियो भने अझै पनि नेकपा एकता जोगाउन सकिने उनले बताए । ‘धेरै ठाउँमा उहाँहरूले बोलेको कुरा सुन्दा एकताको पक्षमा दुवै अध्यक्ष अझै आइसक्नु भएको छैन,’ गौतमले भने, ‘मेरोचाहिँ प्रयत्न के छ भने केपी ओलीतिर रहेका सेकेन्ड जेनेरेसनका र प्रचण्डतिर रहेका सेकेन्ड जेनेरेसनका कमरेडहरूलाई एकताबद्ध गर्ने, तलबाट एउटा ठूलो पंक्ति तयार गर्ने र एकताको पक्षमा र जुन नेता एकताको पक्षमा हुनुहुन्न उहाँलाई भोट नदिने । यो अभियान अब हामीले चलाउँदैछौं र चारैतिरबाट यी दुई वटै नेतालाई घेराबन्दी गर्न सकियो भने एकता गर्न सकिएला ।’

गौतमले आफू विभाजित नेकपाको कुनै पनि पक्षमा नलागेर एकता अभियानमा लाग्ने बताएका छन् ।