नयाँ सत्ता समीकरणको लागि निर्णायक मानिएको जनता समाजवादी पार्टीसँग संसदको दोस्रो ठूलो दल नेपाली कांग्रेसका शीर्ष नेताहरुले छलफल गरेका छन् । छलफल सकारात्मक रहेको दुवै दलका नेताहरुले दाबी गरेका छन् ।

नेपाली कांग्रेसका सभापति शेरबहादुर देउवानिवास बूढानीलकण्ठमा शुक्रवार अपरान्ह भएको बैठकमा दुवै दललले राष्ट्रिय राजनीतिको सम्बन्धमा साझा निष्कर्ष बनाउने सहमति गरेको हो । दुवै दलले माओवादी केन्द्रसहितको संयुक्त बैठक बसेर एउटा निष्कर्षमा पुगिने बताएका छन् ।

बैठकपछि कांग्रेस प्रवक्ता विश्वप्रकाश शर्माले प्रतिनिधि सभा विघटन भएपछि तीन दलले साझा निष्कर्ष निकालेकोमा फेरि अर्को खण्ड प्रारम्भ भएको बताए ।

‘हाम्रो पार्टीको पदाधिकारी बैठकले प्रधानमन्त्री केपी शर्मा ओलीको सरकारको सन्दर्भमा एउटा धारणा बनाएर उचित निष्कर्षमा पुग्नुपर्छ भन्ने धारणा ल्यायो । दुवै बैठकको सार प्रतिनिधि सभाको विघटन भएपछि कांग्रेसको नेतृत्वमा साझा धारणा बनेको थियो । आज संभवत अर्को खण्ड प्रारम्भ भएको छ, केही दिन प्रतिक्षा गर्नुपर्ने हुन्छ,’ प्रवक्ता शर्माले भने ।

बैठकमा कांग्रेसले नयाँ सत्ता समीकरण बनाउन प्रस्ताव गरेको थियो ।

‘पार्टी पदाधिकारी बैठकमा पनि ओलीको विकल्प दिनुपर्छ भन्ने कुरा उठेको छ । जसपाका नेताहरुले पनि प्रमुख प्रतिपक्षको कांग्रेसको अग्रसरताले निकास हुन्छ भन्दै कांग्रेसको भूमिकाको खोजी गर्नुभएको छ । परिस्थिती थप परिपक्व बन्नको लागि प्रतिक्षारत छौ,’ शर्माले भने, ‘आजको संवादपछि हिजो भन्दा परिस्थिति बदलिएको छ, थप परिपक्वताको प्रतिक्षा गर्नुपर्छ । हामीले हतारिएर निर्णय गरेको भए राष्ट्रिय राजनीति अप्ठेरोमा पुग्थ्यो होला ।’

बैठकका कांग्रेस सभापति देउवा, उपसभापति विमलेन्द्र निधि, नेता कृष्ण सिटौला लगायत सहभागी थिए । त्यस्तै जसपाका तर्फबाट अध्यक्ष ठाकुर, नेता डा. बाबुराम भट्टराई, उपेन्द्र यादव र राजेन्द्र महतोलगायत थिए ।

बैठकपछि नेता ठाकुरले मिलेर जानेबारे प्रस्ताव आएको बताएका छन् ।

‘अहिलेको अवस्था मिलेर जाने प्रस्ताव आएको छ, हाम्रो पनि कुरा राख्यौं, मुद्दा फिर्ता हुनुपर्छ भन्ने कुरा राख्यौं,’ ठाकुरले भने । उनले नयाँ सरकार गठनको विषयमा भने छलफल नभएको बताए ।