सर्वाेच्च अदालतले नेकपा एकता बदर गर्दै नेकपा एमाले र माओवादी केन्द्र ब्युँताएपछि दुवै पार्टी छुट्टाछुट्टै गतिविधिमा लागेका छन् । तर शनिवार माओवादी पार्टी कार्यालय पेरिसडाँडामा अनौठो दृश्य देखियो ।

नेकपा एमालेका नेता भीम रावल माओवादी केन्द्रको स्थायी कमिटी बैठकमा छिरेर बाहिरिए । उनले पार्टी कार्यालय बाहिर सञ्चारकर्मीलाई कुनै प्रतिक्रिया दिएनन् । 

एमाले अध्यक्ष तथा प्रधानमन्त्री केपी शर्मा ओलीले माधवकुमार नेपाल पक्षलाई बाइपास गर्दै एकलौटी निर्णय गरेर अगाडि बढिरहेको बेला नेता रावल माओवादी बैठकमा पुग्नुलाई अर्थपूर्ण रूपमा हेरिएको छ ।

नेकपा एकता हुँदा माओवादी अध्यक्ष पुष्पकमल दाहाल ‘प्रचण्ड’ र एमालेको माधवकुमार नेपाल पक्ष ओलीविरुद्ध सामूहिक संघर्ष गरिरहेका थिए ।

शनिवारको नेकपा माओवादी केन्द्रको स्थायी कमिटी बैठकले गृहमन्त्री रामबहादुर थापासहित माओवादीका सांसदलाई २४ घण्टाभित्र सरकार छाड्न निर्देशन दिएको छ ।

बैठकले माओवादी केन्द्रका तर्फबाट सांसद रहेका मन्त्रीहरूलाई सरकार छाड्न निर्देशन दिएको प्रवक्ता नारायणकाजी श्रेष्ठले जानकारी दिए ।

माओवादीका सांसदहरू गृहमन्त्री रामबहादुर थापा ‘बादल’, ऊर्जामन्त्री टोपबहादुर रायमाझी, उद्योग मन्त्री लेखराज भट्ट, शहरी विकास मन्त्री प्रभू साह, श्रम मन्त्री गौरीशंकर चौधरी सरकारमा सहभागी छन् ।

यी नेताहरू माओवादी छाडेर नेकपा एमालेमा प्रवेश गरिसकेका भएपनि कारवाही प्रक्रिया अगाडि बढाउन माओवादी केन्द्रले औपचारिक निर्देशन दिएको हो ।