रुसको काजान शहरमा एक सर्कसमा दुईवटा प्रशिक्षित हात्तीहरूबीच भिडन्त हुँदा दर्शकहरूको भागाभाग भएको छ । 
 

प्रशिक्षकहरूले यो प्रभुत्वका लागि गरिएको संघर्ष भनेका छन् । 
 

अन्लाइनमा आएको भिडियो फूटेजमा एउटा हात्तीले अर्कोलाई धकेलेर लडाइदिएको अनि पर्खाल भत्किएको र दर्शकहरू ढोकातिर भागेको देखिन्छ । 
 

काजान राज्य सर्कसका एक प्रवक्ताले कसैलाई पनि चोटपटक नलागेको र दुई हात्तीलाई छुट्ट्याइएको जानकारी सञ्चारकर्मीहरूलाई दिएका छन् । 

एक प्रशिक्षकका अनुसार, ती दुवै पोथी हात्ती अर्थात् ढोइ हुन् र उनीहरूबीच प्रभुत्वको लडाइँ चलेको हो । रुसमा ढोइ मात्र पाइने उनले बताए । 
 

पशुअधिकारवादीहरूले सर्कसमा जनावरहरूको उपयोगका विषयमा आपत्ति जनाएका छन् ।