भारतको पश्चिम बंगालमा भारतीय जनता पार्टी र तृणमूल कांग्रेसको चुनावी भिडन्त चर्किरहेको छ ।

दुवै दल आरोप प्रत्यारोपमा ओर्लिएका छन् । 

केही दिनअघि ममता बनर्जीले आफूमाथि भाजपाले आक्रमण गरेको आरोप लगाएकी थिइन् । हालै चाहिँ एउटा चुनावी सभामा ममताले गृहमन्त्री अमित शाह मार्न चाहन्छन् भनी आरोप लगाइन् । 

उनले भनिन्, ‘तिमीले मलाई घाइते बनायौ । मलाई मरेको देख्न चाहन्थ्यौ तर म डराइनँ ।’

यसअघि उनले नाम नलिइकन एक राजनीतिक दल फाइदा उठाउनका लागि आफूलाई मार्न खोजिरहेको बताइन् । उनीहरूको काम गर्ने तरिका यही हो, पहिला व्यक्तिको चरित्र हत्या गर्ने अनि पनि व्यक्तिलाई नै सिध्याइदिने । 

उनले भनेकी थिइन्, ‘तर म मृत्युसँग डराउँदिनँ । मलाई मार्ने षड्यन्त्र पहिले पनि रचिएको थियो । एक राजनीतिक दलले मलाई मार्ने योजना बनाइरहेको मलाई थाहा छ । उनीहरूले यसै उद्देश्यका लागि सुपारी पनि दिएका छन् । पैसा लिएर हत्या गर्नेहरूलाई पेश्की दिइसकिएको छ र मेरो घरको रेकी गरिँदैछ ।’