सत्ता समीकरण फेरबदलमा निर्णायक शक्ति मानिएको जनता समाजवादी पार्टी (जसपा) पदाधिकारी बैठक शुरू भएको छ ।

जसपा संघीय परिषद् अध्यक्ष डा. बाबुराम भट्टराईले बैठक सौहार्दपूर्ण र गम्भीर वातावरणमा शुरू भएको जानकारी सामाजिक सञ्जाल ट्विटरमार्फत दिए ।

उनले ट्विटरमा लेखेका छन्, ‘उदीयमान वैकल्पिक शक्ति हुनुको नाताले जसपाले विद्यमान राष्ट्रिय राजनीतिक संकटको अग्रगामी समाधान निम्ति अग्रणी भूमिका खेल्नैपर्छ । जसपा अरूसँग मागेर खाने कमजोर जातीय/क्षेत्रीय शक्ति हैन, सच्चा राष्ट्रिय शक्ति बन्नु छ ।’

शुक्रवारै प्रमुख प्रतिपक्षी दल नेपाली कांग्रेसले नयाँ सरकार गठनबारे नेकपा माओवादी केन्द्र र जसपासँग छलफल गरेको छ ।